Minister Larmonie –  Cecilia a tene un rekorido ku Reda Sosial pa asina risibí informashon tokante estado di diferente kas.

Willemstad,– Na mei 2023 ministerio di SOAW a buta 1.5 mion florin na disposishon pa drecha entre 90 pa 100 kas ku ta den un estado deplorabel.

Segun e komunikado publiká, SOAW a buta un sima di 1.5 mion florin na disposishon pa asina Reda Sosial por ehekutá e trabounan. E último biaha ku Reda Sosial a risibí un suma supstansial pa drecha kas tabata na aña 2018. E komunikado a splika tambe ku añanan anterior e fundashon tabata risibí solamente 100 mil florin pa drecha algun kas so.

Vigilante a risibí e informashon ku e trabounan pa drecha e kasnan ta moviendo den e direkshon korekto. “Aktualmente 20 kas ya a wòrdu drechá i e trabounan ta moviendo den e direkshon korekto”. Reda Sosial ta manehá un lista di petishonnan ku ta drenta serka diferente instansia. Basá riba e petishon nan risibí ta hasi un análisis di kada petishon promé ku drecha un kas.

Reda Sosial ta ehekutá trabounan pa drecha bibamentu den barionan di ménos rekurso. E fundashon tin un programa pa kombatí pobresa den 6 diferente bario, kual ta Soto, Kanga/Dein, Berg Altena, Seru Grandi/Fuik, Rooi Santu i Otrobanda. E programanan ta enfatisá entre otro drechamentu di kas deplorabel i organisá aktividatnan di edukashon.