590 mil: sumanan kasi mionario pa un kompania kòrta yerba riba tereno di isla.

Isla, — Refineria di Kòrsou siman pasá a tene un seremonia ofisial pa anunsiá un akuerdo ku PDVSA di 450 mion dòler den tèrmino di 10 aña. Informashonnan risibi ta indiká ku e organisashon no ta kumpliendo ku reglanan i proseder di bon maneho i kumplimentu. Un di e problemanan interno mas grandi den Refineria di Kòrsou i CRU ta e proseder di destaho na momento di oferta pa proyekto.

Awor ku PDVSA durante 10 aña ta bai manda produkto pa Kòrsou, na balor di 45 mion dòler anual, mester laga ouditá e proseso di destaho den ámbos organisashon. E sospechonan di inkumplimentu responsabel a inisiá durante e último proseso di Arawak, naturalmente unda a Refineria di Kòrsou a laga rekomendá un grupo di sosio venezolano sin tabatin e organisashon kapasitá pa kumplimentu. No esei so, Refineria di Kòrsou huntu ku e grupo en kestion konsientemente a despista Parlamento di Gobièrnu di Kòrsou.

Tin mas duda ta saliendo for di e organisashon. Na 2022, CRU a paga por ehèmpel 590 mil florin pa kòrta yerba riba tereno di Isla (weeding). No tabatin un destaho miéntras den pasado tabatin un kantidat di sinku kontratista tabata hasi e trabou pa alrededor di 1 mion florin. Na 2022 a paga e kompania D.G. mas ku mitar di e suma, sin tabatin un proseder di destaho. Mas serio ainda, e kompania tin por lo ménos 3 aña ta trahando riba Isla sin tabatin un destaho pa e trabou. Ta trata di un trabou di kasi 50 mil florin mensual i registro na CRU no ta indikativo kuantu hende DG tabata pone riba e trabou, miéntras den pasado weeding tabata duna por lo ménos 40 kupo di trabou. Awor aki, tur e pagonan ta bai na e kompania D.G. ku apénas ta trahadó ku 3 persona riba tereno di Isla. Interno a inisiá un proseso di sondeo ta kon bini e proyekto tabata andando sin un destaho, pero e proseso ei no a dura muchu pa despues a laga pone unu di e funshonarionan ku tabata investigando riba non-aktif i hasta despues dun’é su karta di retiro. Te awe, no a bini un splikashon kon bini na CRU e kompania ku ta hasi weeding ta trahando sin nunka a partisipá na un destaho.

Riba e presupuesto di CRU pa 2022 tin e kosto di Janitorial (Building and Grounds, including Yard Cleaning). Pa 2022, tabatin un suma riba presupuesto di Nafl. 742.000,=  pa hinter pòst for di kual e kompania D.G. a risibi Nalf 590.000,=. Pa 2023 tambe e mesun kompania a sigui traha sin tabatin un destaho. Riba e presupuesto tabatin un suma di Nafl. 708.000,= for di kual D.G. a risibi mayoria di e pago pa kòrta yerba riba tereno di Isla.

Lokual ta remarkabel den e proyekto di ”weeding” ta ku e proseso di aprobashon no a bai segun proseder interno di e kompania. Manera menshona, esaki a inisiá un investigashon interno i sondeo ta for di unda ken a duna tarea pa D.G. por tabatin e trabou asina largu sin a gana esaki mediante un destaho públiko. Diripiente, durante di e investigashon a pone a funshonario en kestion riba non-aktif i pa siman pasá dun’é su retiro. A bin resultá ku aparte di e proyekto di weeding, tin mas trabou i entrega na CRU sin tabatin e destaho adekuá.