Invema ta un kompania invershonista establesé na Inglatera.

Isla—Refineria di Kòrsou, no tin idea di warda riba resultadonan di un investigashon penal riba posibel falsifikashon di dokumento relashoná ku destaho pa maneho di Refineria Isla. For di pòst digital entre sosionan envolví, por dedusí ku funshonarionan di RdK a konfirmá ku ainda e bid entrega pa Socap (eks sosio CPR) te esun di mas mihó.

Vigilante a tuma kontakto ayera ku Alvin Martina, enkargá ku e komunikashon na RdK, kende lo duna un kontesta awe. Ta asina ku fiskal di Ministerio Públiko, Guillano Schoop a konfirmá na Vigilante ku e investigashon penal riba falsifikashon di dokumento den e proyekto Arawak ta den proseso ainda.  ‘Mi sa ku e investigashon ta tumando lugá, pero mi no por bisa den kua fase e ta. Hecho ta ku tin un investigashon tumando lugá’, e la duna di konosé. Entretantu, e kompania Socap kual kompania a gana e bid pa Refineria Isla a sigui buska sosionan internashonal i ta kombensé ku nan “bid” ta esun mihó. For di korespondensha, por dedusí ku Refineria di Kòrsou a informá representantenan di Socap, ku ainda nan oferta ta esun di mas mihó.

Den kuadro di esaki, Raul Socorro, direktor di Socap den un mail ta splika representantenan di SKP Global ku gerensha na RdK a konfirmá nan ku nan tin e mihó oferta i pa sigui dal bai buska un invershonista serio. Segun Socorro, RdK a duna instrukshon pa buska un invershonista konfiabel ku por duna sosten na e proyekto. Tambe a sosio konfiabel ta bira e akshonista mayoritario den e asosiashon ku mester ehekutá e proyekto, den e kaso aki Maneho di Refineria Isla.

Ta indikando ku Socap a buska kontakto ku e kompania SKP Global, ku na su turno tin kontakto ku e kompania Invema, registrá na Inglatera. A laga draft un karta, unda Invema ta proponé i informá Refineria di Kòrsou, pa nan bira e sosio finansiero di Socap i nan ta duna un garantia di 150 mion dòler estado unidense. Manera menshoná, Vigilante ta wardando riba e un kontesta di Refineria di Kòrsou riba e aparishon di Invema den nan senario. INVEMA, supuestamente mester ta mandando of a manda un karta na RdK, konfirmando ku nan ta dispuesto na pone 150 mion dòler  komo garantia riba un kuenta intermediario, miéntras ta negoshando un “Heads of Agreement”. Esaki ta nifiká ku definitivamente e yu di Kòrsou,  Erchenel Doran i su eks koleganan direktor, Alejandro Marquez, Raul Socorro i Leonardo Taborda a separá. Por lo pronto, Erchenel Doran ta keda ku kòntròl riba e akshonnan den CPR BV, pero mester tene hopi koutela pendiente un tratamentu a fondo entamá pa mesun grupo di venezolano. Awor ku e grupo venezolano a pèrdè kòntròl riba CPR, nan a lanta un kompania nobo, Baranka Petroleum. Miéntras tur e desaroyonan menshoná ta tumando lugá, na Bullenbaai tambe a kibra kontrakt ku CPR.

Ta bini desaroyonan interesante riba e bataya fuerte ku ta tumando lugá pa kòntròl di Bullenbaai i maneho na Refineria Isla.