Koredónan di baiskel tin mesun derechi ku outomobilistanan.

Willemstad,– Relashoná ku un aksidente entre un vehíkulo motorisá i un baiskel, ta importante pa rekordá ki derechi un koredó di baiskel tin riba kayanan públiko.

Den e leinan di tráfiko por nota ku e lei ta splika tokante vehíkulo i usadó di kaya. Tantu e definishon di vehíkulo komo e definishon di usadó di kaya ta konsiderá e koredó di baiskel na mesun nivel na vehíkulonan motorisá manera outo i bròmer. Den e lei por nota ku koredónan di baiskel mester trata na kore mas rèks posibel, pero den e mesun artíkulo e lei ta menshoná ku baiskelnan por kore maksimal dos banda di otro.

Mas aleu, e lei ta splika ku koredónan di baiskel ta obligá na kore riba e karetera di baiskel, pero si no tin un karetera spesial pa baiskel, mester usa e kaya públiko. Remarkabel ku e lei no ta menshoná ku koredónan di baiskel mester kore riba alsera. Segun e lei, alsera ta destiná pa peaton i no bai baiskel. Tambe e lei ta menshoná ku un koredó riba baiskel mester pasa otro koredó di baiskel na banda lenks, pero por pasa otro vehíkulonan  riba banda rèks.

Pa e parti di duna preferensha, nos leinan di tráfiko ta indiká ku koredónan di baiskel ta obligá na duna preferensha na vehíkulonan motorisá.  Mas aleu, e lei di tráfiko ta dikta ku koredónan di baiskel ta obligá na usa lus riba nan baiskel na momentu ku e visibilidat ta malu òf na momentu ku anochi sera. Segun e lei, un koredó di baiskel ta obligá na kore tantu un lus dilanti komo lus patras.

Eksigensianan tékniko di un baiskel
E lei di tráfiko ta duna diferente eksigensia tékniko di un baiskel pa asina sòru ku e baiskel ta seif pa kore. Segun e lei, un baiskel no por kore karga mas hanchu ku 75 cm. Si akaso e baiskel tin mas ku dos wiel por kore ku karga ku un hanchura máksimo di 1`.5 m Tambe e baiskel mester tin un stür adekuá ku ta inkluí un bèl, por lo mínimo 1 brek i un lus dilanti i un lus patras.

Kultura di kore baiskel na Kòrsou
Basá riba e infrastruktura di Kòrsou ku ta enfatisá korementu di outo, por nota ku a krea un kultura ku korementu di baiskel ta algu rekreativo ku mester sosodé solamente den mondi. Hopoi shofùr di vehíkulonan motorisá no ta realisá ku un baiskel tin mesun derechi riba kayanan públiko. Mas aleu ainda, por nota ku outomoblistanan no ta realisá ku un baiskel tambe ta un metódo di transporte pa bai entre otro trabou.

Kalkulashon nan na Hulanda a konkluí ku Hulanda tin alrededor di 35 mil km di karetera di baiskel, pero na Kòrsou tin ménos ku 5 km. Sinembargo, e áreanan ku tin karetera spesialisá pa baiskel na Kòrsou ta den áreanan ku no tin masha trafikashon di baiskel riba forma diario.