Punda— Redakshon di Vigilante a kaba di konfirmá ku e rèper Hulandes Joost Theo Sylvio Yussef Abdelgalil Dowib, konosí komo “ Josylvio”, a wòrdu detené na aeropuerto ayera pa motibu di insulto i estorbo di òrdu públiko i no paso e la biaha ku un PCR-Test falsu.

Riba ret sosial por a tuma nota di un grabashon ku ta bai rònt na momentu ku un hòmber tabata forsegia ku e seguridat na aeropuerto i un agente polisial, pa despues e hòmber aki lo a risibí un wanta serka e agente polisial. Despues di a risibí e wanta aki e la keda arestá na aeropuerto, testigunan por a tuma nota ku ta trata aki di e rèper Hulandes “Josylvio”. Despues di ku e grabashon aki tabata bai rònt riba ret sosial tabatin basta rumor rondó di esaki, pero no por a konfirmá si tur e rumor nan aki ta kuadra.

Awe redakshon di Vigilante a konfirmá ku tabata pa motibu ku personal di Imigrashon na Hato a ninga di laga e rèper drenta nos isla paso su dokumentu di biahe no tabata na òrdu, ku e rèper a kuminsá bira bastante ònbeskòp kontra di e personal na aeropuerto. El a kuminsá insultá esaki miéntras el a sòru bastante ratu pa estorbo di òrdu públiko. Polis mester a aktua ku man duru kontra di dje i asta a detené na aeropuerto mes. No ta konosí pa Vigilante ta kua ta e dokumento nan ku e no tabatin na òrdu, segun “Telegraaf” na Hulanda ta trata aki di un PCR-Test falsu pero e kompania “Testcoronanu.nl ” a indiká ku esaki no ta kuadra komo e rèper ta un fiel kliente di nan.

Ta trata aki di e rèper Hulandes “Josylvio” ku tin alrededor di 600 mil siguidó riba Instagram i ku asta na aña 2018 e la saka un video Clip aki mes na Kòrsou ku ta karga e nòmber “Catch Up” ku tin mas ku 28 mion views riba e plataforma di Youtube. Redakshon di Vigilante lo bai sigui e desaroyo rondó di e kaso aki pa asina sigui informá pueblo e informashon korekto.