EINDHOVEN—Hulanda definitivamente lo entregá avionnan di kombate huntu ku Dinamarka na Ukraina.

Asina premier demishonario Mark Rutte a anunsia ayera despues di konsulta ku e presidente ukraino Volodymyr Zelensky na e base aerea militar na Eindhoven. Ta promé biaha ku un pais oksidental ta duna avionnan di kombate na Ukraina. Anteriormente gobièrnu na Kyiv tabata haña avionnan di kombate ruso for di e paisnan di bloke este. Zelensky pa basta tempu ta pidi avionnan di F-16’s. Hulanda i Dinamarka a bisa algun luna pasa ku nan lo entregá  avionnan di kombate, pero mester a warda riba aprobashon di Merka. E siman aki Merka a duna lus bèrde. Premier demishonario Mark Rutte no por a bisa ki dia Ukraina ta haña e avionnan. Ainda e pilotonan ukraino mester haña entrenamentu. Ainda ta traha riba kurso di idioma. Kier kuminsa mas rapido posibel ku e training militar. Despues kier entrega e avionnan na Ukraina. Posiblemente te zomer 2024 Ukraina lo haña e F-16. Tokante e kantidat Rutte a bisa ku Hulanda ta dispone di 42 avion F16.