Emelina ku Gonzales ayera despues di e veredikto.

Nieuwe Haven—Sheryl Emelina ayera durante un entrevista ku Vigilante, a splika ku komo polis den departamento di pèrmit, bo no por keda sin tin kontakto ku kliente. E kontaktonan ku Emelina tabatin ku e.o. Sergio Francilon, a kondusí Ministerio Publiko pa investigá mas profundo, unda a lanta sospechonan di soborno i falsifikashon. Ayera Korte a rechasá tur e akusashonnan.

Segun defensa di agente polisial, Emelina, su kliente nunka por tabata na altura ku e hòmber Sergio Francilon a entrega dokumentonan falsifiká pa haña pèrmit di karga arma. Esaki ta lokual mr. Athena Sulvaran a trese dilanti, durante e kaso di Ministerio Públiko kontra di Emelina. Ministerio Públiko ta akusá Emelina, en konhunto di falsifikashon. Sergio Francilon, un hòmber di Haiti pero hopi aña bibá na Kòrsou tabata esun kende a entrega e dokumentashonnan falsu na e departamentu di pèrmit, unda agente funshonario polisial Emelina ta traha. Francilon alabes ta sintando un kastigu di 10 aña pa sende edifisio di impuesto na kandela. Francilon, a súplika un pèrmit pa karga arma, despues ku deskonosínan a trata na atrak’é na su kas. Pero pa por a logra haña e pèrmit, e la entrega un deklarashon falsu di entrada, pa krea e impreshon ku e tabatin un funshoná di direktor na un kompania.

Segun Sulvaran, i Korte bai di akuerdo,  pa prueba falsifikashon mester tabatin un plan. Esei no te kaso pa su kliente. Pa falsifiká mester di un plan i den e kaso kontra Emelina ta mustra ku e planifikashon falta. Aló ménos di su parti, pues pa e kaso bo no por yega na un desishon riba kulpa probá. Emelina no a uza niun dokumento falsifiká pa su uso. E eks-hefe di e Divishon pa pèrmit, Schoop, a deklará ku  despues di e akusashonnan el a bin deskubrí ku tabatin un deklarashon di entrada falsifiká.

Testigu i kolega di polis, De Palma ta alegá ku Emelina tabata sa ku De Palma no a gusta e dokumentonan. De Palm a bisa di a informá Emelina ku e tabata kontra di e dokumentonan i ku el a pone algun punto di preokupashon tokante e supuesto dokumentu falsifiká. Segun Athena Sulvaran, su kliente no ta ninga ku e sa ku De Palm tabatin opheshon. E la hasta bisa De Palm ku e desishon ta den man di Chayenne Gonzales (ko akusado) i no di De Palm. Chayenne Gonzales, nan superior, ta indiká na Emelina ku e proseso di aplikashon mester sigui pa nan por reanudá nan trabounan manera kustumber. Abase di esaki, Emelina a sigui ku e trabounan konforme órden di su superior.

Korte a hana no tabatin sufisiente prueba pa kondena Emelina pa aktonan di soborno ni tampoko di falsifikashon. E polis a risibi 30 ora di trabou pa fiamentu di sen sin tabatin un pèrmit pa ekstedne kredito.