WILLEMSTAD,– No ta nesesario pa ahustá e staatsregeling di Kòrsou pa impedí matrimonio homoseksual. Esei ta e konklushon di e hunta d konseho  riba e petishon pa konseho pa loke ta e proyekto presentá pa Rennox Calmes.

E hunta a yega na e konklushon aki basando nan mes riba e dos posibel senarionan ku lo por keda presentá awor ku korte supremo di Hulanda ta bai pronunsiá den kasashon tokante di e sentensia di korte di Kòrsou ku a dikta ku e eksklushon di matrimonio di parti di personanan di mesun sekso ta kontrali na e konstitushon i ta krea deskriminashon.

Ban suponé ku Korte Supremo no kambia e desishon di e korte di Kòrsou, esaki ta nifiká ku Korte Supremo ta kere ku e parehanan di e mesun sekso ta ser trata inhustamente pa loke ta e derecho ora nan kasa. Den e kaso aki, e artíkulo nobo ku Calmes kier inkluí den e areglo di estado, ku solamente ta rekonosé matrimonio entre hòmber i muhé, lo no kambia masha.

E parehanan di mesun sekso ainda lo por denunsia ku nan ta ser trata inhustamente segun e areglo di estado mustrando riba e disposishon kontra deskriminashon.

Pues hues lo por dikta ku Kòrsou ta aktuando ilegalmente dor di no habri e matrimonio pa parehanan di e mesun sekso. Resumiendo, inkluso ku e artíkulo nobo, e situashon di e parehanan di e mesun sekso realmente lo no kambia, segun e hunta di konseho.

Ban pone mes ku Korte Supremo kambia su desishon i dikta ku no tin un trato inhustu. Den e kaso aki, e artíkulo nobo di Rennox Calmes lo no tin ningun efekto riba e situashon aktual den kual e parehanan di e mesun sekso no por kasa. Pues e lo ta redundante.

E hunta di konseho a señalá ku e senario ainda lo mester ofresé alternativanan komparabel na matrimonio pa kumpli ku e obligashonnan internashonal.

E areglo di estado ta papia tokante di e konstitushon di Kòrsou ku ta garantisá e derechonan fundamental i e estado di derecho demokrátikamente.

E legisladó mester respetá e funshon di garantia di e derechonan fundamental den tur sirkunstansia i tambe semper mester kontrastá e legislashon ku keda proponé ku tur e rekisitonan di supsidiaridat i proporshonalidat. Den tèrminonan fásil, esaki ta nifiká ku lo evaluá si un determinado medida òf desishon ta nesesario i rasonabel.

Ku otro palabranan, e konseho ta sigui ku su konklushon, inkluso si e legisladó konsiderá ku ta eksistí bon argumentunan pa ekskluí e matrimonio di e mesun sekso, mester tene na kuenta ku e interes ku ta deseá, mester keda proporshoná na infrakshon ku e legislashon ku a proponé ta pa e interesnan individual. E eksposishon di motibunan lo mester keda revelá na e konsiderashon nan ku e legisladó a trese. Pa último e hunta di konseho a atvertí gobièrnu i parlamento ku den kualkier kaso un union hurídiko komparabel ku e matrimonio mester keda traha konforme artíkulo 8 di EVRM. Ku ta stipulá ku e parehanan di e mesun sekso no solamente tin derecho di keda rekonosé den nan bida priva, pero tambe e derecho di un bida familiar.