Konfiansa: Van Heydoorn ta pidi pa duna gobièrnu di Kòrsou e konfiansa ku nan lo solushoná i duna klaridat na lokual a sosodé

Cas Cora – Durante e enkuentro na Marnix College relashoná ku e suseso ku a tuma lugá djamars último, Minister di Enseñansa Van Heydoorn a splika dosente i mayornan presente e desishonnan ku a tuma den kuadro di enseñansa.

Djamars último, Minister di Enseñansa Sithree Van Heydoorn a risibí un yamada serka direktiva di VPCO van der Bunt ku a duna Van Heydoorn e notisia di lokual a sosodé. Riba petishon di Minister Van Heydoorn, Kuerpo Polisial huntu ku direktiva VPCO a tene e rueda di prensa ku a tuma lugá djárason 8 di sèptèmber 2021. Tambe Van Heydoorn a pidi miembronan di su ministerio pa mesora bini ku solushonnan pa kuminsá ku e proseso pa duna e ayudo nesesario. Un di e instanshanan ku Ministerio di Enseñansa a tuma kontakto kuné pa asistí den e proseso aki tabata fundashon Slachtofferhulp. Na momentu ku fundashon Slachtofferhulp a yega na Marnix College a tuma nota ku tin mester di mas yudansa i na e momentu ei Ministerio di Enseñansa a pidi SIGE tambe pa akudí na Marnix pa asina duna sosten na e proseso di rekuperashon.

Hopi krítika ta lokual Ministerio di Enseñansa a risibí relashoná ku e suseso, esaki ta lokual Minister Van Heydoorn a duna di konosé. E la splika ku a opta pa kana e kaminda den silensio pa motibu ku tin prosesonan ku mester kana pa evitá ku ta tuma desishon purá i mañan resultá den un desishon ménos bon. E promé desishon ku a tuma tabata pa tene Marnix College será pa e siguiente dos dianan i pa invitá direktiva di VPCO na e reunion ku a tuma lugá ayera den oranan di mainta na Ministerio di Hustisia.

Awor ku a tuma e akshon nesesario den kuadro di enseñansa i tambe di hustisia a yega e momentu pa drenta e siguiente etapa. Segun Van Heydoorn a splika, “E siguiente etapa ta unu hopi importante ku ta e etapa di mediashon i pa yuda esnan ku ta den e trouma sali for di dje.” E trayekto aki ta unu ku mester hasi den pas i trankilidat si no e no ta surgi efekto. Van Heydoorn a splika ku e trayekto ta unu ku si nos ta kere por hasi via medio sosial, nos ta hasiendo esaki robes. Mas aleu, Van Heydoorn a urgí pa duna e personanan enkargá ku e proseso di mediashon e espasio nesesario pa nan traha. Tambe e la pidi pa duna gobièrnu di Kòrsou e konfiansa ku nan lo solushoná i duna klaridat na lokual a sosodé.