E impakto ekonomiko di turismo riba ganashi generá for di sektor di turismo te ku awor, ta alrededor di 2 bion florin.

Willemstad, — Te ku awor Kòrsou a generá alrededor di 2 bion florin for di e gastunan ku turistanan ta hasi na nos pais. Ta ferwagt ku e impakto ekonómiko positivo riba ekonomia di Kòrsou lo sigui krese.

Zulaika Mook, direktora di sektor na MEO, a elaborá ku kompará ku aña 2022, por mira ku tin un kresementu di 17% pa loke ta trata e impakto sektoral di ganashi via turismo den ekonomia di Kòrsou. Segun direktora di sektor na MEO, te ku awor a generá alrededor di 2 bion florin den ekonomia di Kòrsou via e sektor di turismo. Zulaika Mook  a bisa ku e suma aki ta bini for di e impakto direkto di turismo, pues e gastunan ku e turistanan a hasi direktamente den restorant, kompra i mas. Tambe e suma aki ta bini di e parti indirekto di turismo kual ta konsistí di impuesto i transakshonnan finansiero.

E invershonnan mas direkto di turismo, un gran parti a bai na akomodashon i esaki ta un di e gastunan mas grandi ku turistanan ta hasi. E gastu pa ku akomodashon ta alrededor di 36%. E segundo invershon di parti di turistanan ta den restorant ku ta alrededor di 28% di e totalidat di e gastunan ku turistanan a hasi.

Di e gastunan indirekto, Zulaika Mook ta menshoná ku e entrada di impuesto pa gobièrnu di Kòrsou tabatin un kresementu di 18%. E entradanan di  impuesto ta konsistí di ‘home tax’ kual ta e impuesto ku turista ta paga riba e kamber i tambe e ‘omzetbelasting’ ku turistanan ta paga ora bai restorant òf otro tipo di kompra. Zulaika Mook a elaborá ku e diferente áreanan di e sektor di turismo a duna numbernan positivo.

Zulaika Mook a menshoná ku turismo tabatin un impaktonan makro ekonómiko positivo riba pais Kòrsou i lo ferwagt ku esakinan lo sigui krese.