Opshon:Venezuela no ta opshon na e momentunan aki pa turismo di Kòrsou.

Punda—Por lo pronto, turismo for di Venezuela ta bira imposibel stimulá. Aparte di restriskhon di visa pa sali for di e pais pa por yega Kòrsou, bishitantenan for di Venezuela pa vakashon na Kòrsou, ta un merkado nobo.

Kontrali na espektativa, den pasado e merkado di turismo for di Venezuela a kuminsá floha. For di 2015 turismo di Venezuela a kuminsá kai. For di sifranan publiká por nota ku for di 2015 turismo for di Venezuela a kuminsá baha riba un forma bastante drástiko. Kaminda na dezèmber 2015 alrededor di 95 mil turista Venezolano a bishitá Kòrsou, na dezèmber 2022 solamente 1030 turista fo’i Venezuela a bishitá nos isla.

Krísis ekonómiko i sanshon nan riba e gobièrnu Venezolano tur a hunga un ròl grandi den redukshon di turismo for di Venezuela. Na 2015, 467 mil turista a pasa anochi na Kòrsou kaminda 20%(94.700) a bini for di Venezuela. Apénas 1 aña despues na 2016, 36% ménos turista a bini for di Venezuela kual a suma solamente 60 mil turista. E siguiente aña(2017) e sektor di turismo a haña mas sla for di e merkado Venezolano na momentu ku 52% ménos turista a bishitá Kòrsou kual a suma na 28 mil turista.

Demas sifranan ta indikativo ku e turista di Venezuela tabata gasta mas tantu ku e turista Hulandes na 2016 pa dia durante nan estadia. Apesar ku e krísis ekonómiko di Venezuela a kuminsá na 2010, e turista di Venezuela tabata gasta 117.95 dòler pa dia na Kòrsou kaminda e turista Hulandes tabata gasta 117.35 dòler pa dia. Pues na 2016 e krísis ekonómiko na Venezuela no tabata afektá gastunan diario di e turista Venezolano ainda.

Pero pa stimulá e merkado aki bek ta kasi imposibel. Restrikshon di visa pa solamene 200 turista sali pa islanan ABC i demas partinan di Reino, ta nifiká ku e posibilidatnan ta práktikamente nulo. Tabatin 2 diferente aerolínea, Laser Airlines i Albatros Airlines a kuminsá bula entre Venezuela i Kòrsou tambe pronto un terser aerolina tambe lo kuminsá bula. Entretantu Albatros a pèrdè nan lisensia pa baha na Kòrsou, pero ta trahando pa kumpli ku kondishonnan imponé pa Departamento di Aviashon.  Pa turistanan Venezolano por drenta Kòrsou nan mester di tin aprobashon di un Visa i prueba ku nan tin 150 dòler pa kada dia ku nan keda riba nos isla. Segun Muryad de Bruin di CTB, a imponé reglanan estrikto pa sòru ku turistanan di kalidat di Venezuela por drenta nos isla. Segun de Bruin, aworakí for di Venezuela nos ke turistanan ku por invertí den Kòrsou i alabes gasta sèn riba nos isla.