Hensley Paulina

HATO—E selekshon di estafèt 4×10 Hulanda a yega Kòrsou ayera den kuadro di nan preparashon pa Kampeonato Mundial estafèt na Bahamas. E delegashon ta forma parti di un plan di entrenamentu ku ta enserá alabes e selekshon hulandes di 4×400 meter, inkluso Femke Bol, kendenan ta programá na yega Kòrsou 17 di aprel próksimo.

Ayera riba buelo di KLM a yega e selekshon di estafèt 4×100 di Hulanda. Ta trata di esfuersonan ku e.o. e fundashon Churandy Martina a logra despues di kasi 2 aña di esfuerso. Ta e intenshon pa e selekshon kuminsá prepará pa e mundial di estafèt na Bahamas. Ta trata di e “World Athletics Relays Bahamas 24”, kual isla karibense a logra sede pa 2024. Míles di atleta rònt mundu ta biaha pa Bahamas pa partisipá na e evento mundial 4 i 5 di Mei próksimo. E evento alabes ta sirbi komo klasifikashon pa e siguiente Weganan Olímpiko na Paris i mas ku 40 pais lo partisipá.

https://www.facebook.com/share/v/McpEjvVD2DKiiktB/?mibextid=oFDknk (klik pa wak vidio)

Ayera na Hato tabata presente den e delegashon di Hulanda e legendario Churandy Martina, kende ta unu di e motornan tras di e proyekto kende tambe ta lo ta forma parti di e selekshon hulandes riba 4 x 100. E yunan di Kòrsou, Hensley Paulina i Terrence Agard (400 M) tambe ta bek riba nan isla. Ta e intenshon pa e selekshon di 23 atleta inisiá nan kampamentu e siman aki. E delegashon ta kedando na Blue Bay.