AMSTERDAM—Servisio di Belasting lo kuminsá kobra 35.000 kompania e debe di belasting ku nan a akumulá durante e krisis di Corona.

E kobransa lo keda ehekutá den fase kaminda e empresario por haña yudansa den kada paso. E grupo aki lo haña finalmente bishita di deurwaarder. Esaki di akuerdo ku sekretario di estado demishonario Van Rij (Belasting) den un karta na Tweede Kamer. Na sèptember lo manda mas karta di kobransa pa kompanianan ku retrasonan struktural. For di komienso di e krisis na mart 2020 un total di 400.000 empresario a haña posponementu di debe belasting pa un suma total di 47 miar euro. E yudansa a keda introdusí pa sostene kompanianan durante e krisis di corona. Nan mester a kuminsa paga den oktober 2022 i a haña 5 aña pa paga bek. Na komienso di e areglo di pago tabatin un debe habrí di 19,6 miar euro. E suma entretantu a baha na 14,8 miar euro. Serka e grupo di 35.000 empresario tambe a revoká e areglo di pago. Belasting a manda diferente karta di atvertensia pa alkansa e grupo pero no a haña reakshon. Di e 226.000 hende ku un areglo di pago, 91.000 no a kumpli ku tur pago. 43.000 no a paga ni un termino. Ta trata prinsipalmente di kompanianan chiki ku un debe di menos ku 10.000 euro. algun empresario a spera riba eksonerashon di debe pero esaki no ta e intenshon.