Alexandra van Huffelen, tabata enkargá pa drecha un sistema pa Kòrsou por sigui paga mas impuesto.

Piskadera– Servisio di Impuesto ke pone siudadanonan i empresanan sentral den su strategia nobo, dor di kombiná un servisio digital di kalidat altu ku un aserkamentu personal. Mehorashon di komunikashon ta hunga un papel importante i lo establesé un strategia di komunikashon kla. E pagadó impuesto mester risibí informashon kla, rápido i transparente pa por kumpli ku su obligashonnan. Sinembargo, tin eksigensianan pa un komunikashon eksterno optimal, inkluyendo simplifikashon dje proseso pa kliente.

E maneho di kambio mester ta orientá riba e hende i kultura, i e embolbimentu dje empleadonan ta esensial pa e éksito dje integrashon. “Kreashon di un kultura i mentalidat nobo den e organisashon, kaminda tur hende ta konsiente di dje i ta para su tras, ta importante pa e maneho di kambio. Pa un integrashon propisio di hende i kultura, tin un kantidat di eksigensia ku mester kumpli kuné, manera entre otro un trayekto di liderasgo pa e maneho na tòp, un kultura organisatorio nobo i maneho sostenibel di kambio. E maneho na tòp i e tim di maneho ta responsabel pa e kultura dje organisashon, i e estilo di liderasgo mester kambia di tòp bin abou pa un guia riba kontenido ku rèspèt i konekshon den e relashonnan.”

Tin diferente kultura den e dos organisashonnan ku mester ser integrá den solamente un kultura. “Kreashon di un kultura so ta eksigí komunikashon habrí, koperashon i énfasis riba responsabilidat i meta komun. E Servisio di Impuesto modèrno ke ta un organisashon orientá riba kliente i ta enfoká riba optimalisashon di ICT. Esaki lo resultá den mayor satisfakshon di klientenan, empleadonan mas produktivo i entrada di impuesto mas altu.” Lo organisá e tereno di ICT den dos fase. Den fase 1 lo optimalisá, e infrastruktura básiko di ICT, i despues den fase 2 por implementá e tereno di aplikashonnan modèrno di ICT. “ICT ta krusial pa henter e organisashon i lo ta nesesario den tur proseso i plan pa Servisio di Impuesto.”

Ta p’esei lo ta propisio pa implementá e tereno di aplikashonnan modèrno di ICT mas lihé posibel. Renobashon pa medio di proyektonan di ICT semper ta un tema aktual i ta importante pa nan ta manehá stratégikamente. E prosesonan relevante lo ta adaptá huntu ku e empleadonan, basá riba e futuro tereno di aplikashonnan di ICT.  Segun e tim ku a traha riba e plan, e Plan di Reforma pa Servisio di Impuesto ta ‘un proyekto amplio ku metanan ambisioso, ku sigur lo tin impakto riba e manera ku Servisio di Impuesto na Kòrsou ta funshoná i lo mehorá ademas e servisio ku ta brinda na siudadanonan i empresanan’.