WILLEMSTAD——For di djabièrnè 6 di òktober último a implementá diferente kambio interno den Servisio di Impuesto.

Den e departamentu di ‘kobransa spesial’, tur e portfólionan di klientenan a ser redistribuí entre kobradónan. Redistribushon periódiko di klientenan ta importante den kuadro di maneho di riesgo. Redistribushon ta kontribuí na trato igual i ophetivo di tur kliente ku tin un debe di impuesto. E biaha aki, sin embargo, e redistribushon ta bai ainda mas leu. Despues di e tumamentu di personal den servisio resientemente, awor Servisio di Impuesto tin 29 kobradó. Ademas di esaki, un ekipo separá di 9 empleado ta enkargá awor ku kobransa di personanan partikular ku tin un debe te ku 10,000 florin. For di 1 di òktober último, e saldo habrí na debe di impuesto i di primanan ta un montante chikí di 3 miar florin. Di esaki, 2.5 miar florin (83%) ta relashoná ku debenan di impuesto di klientenan komersial (impuesto riba benta, impuesto riba salario, impuesto riba ganashi, ets.) i 500 mion florin ta relashoná ku personanan partikular ku un debe di impuesto (impuesto riba entrada, OZB, erfpacht, ets.).

Un análisis di e entrada di impuesto ta mustra ku sigur 94,5% di entrada di Servisio di Impuesto ta bini di klientenan komersial i solamente 5,5% di klientenan partikular. E kantidat di number di crib ku un debe di impuesto ta kasi 115.000. Di nan 78.000 ta partikular i 37.000 ta klientenan komersial. Di e 78.000 klientenan partikular ku debe di impuesto, 63.000 kliente tin un debe di ménos ku 10.000 florin. Debí na e kantidat grandi di klientenan partikular, e kobradónan tabatin tiki tempu disponibel pa kobransa efektivo di klientenan komersial, loke finalmente ta laga hopi sèn riba kaya i  pone ku debenan di impuesto di klientenan komersial ta akumulá innesesariamente. Di pursi: un kliente komersial mester paga impuesto riba benta i riba salario mensualmente, miéntras ku un kliente partikular hopi bia ta risibí solamente un biaha pa aña un aanslag. Asina, e urgensia pa kobra na tempu ta hopi biaha mas haltu pa klientenan komersial. Ku e introdukshon di un ekipo separá di 9 empleado pa kobransa di klientenan partikular i ku esaki redukshon konsiderabel den e grandura di e portfólio di klientenan di e 29 kobradónan, awor lo pone mas énfasis riba kobransa di klientenan komersial. Esaki mester duna un impulso positivo riba e pagamentu real di impuesto riba benta, impuesto riba salario i primanan sosial retené. Meskos ku serka e kobradónan, resientemente tabatin un redistribushon di kliente tambe den e departamentu di deurwaarder. Pa motibu ku e portfólio di klientenan di e 19 deurwaardernan ta repartí geográfikamente, nos ta papia awor di un ‘repartishon di rayon’ nobo. Naturalmente, e kambionan aki tin un gran impakto riba e trabounan diario di e empleadonan en kuestion i ta trata pa e transishon fluí mas fásil posibel via komunikashon i guia. E impakto riba klientenan di Servisio di Impuesto ta limitá.

Sitanan previamente programá pa un kòmbersashon tokante debe di impuesto lo ser traspasá pa e kobradó responsabel nobo entrante 16 di òktober. Den kaso ku e ora di e sita kambia komo resultado di e traspaso, e kliente lo wòrdu kontaktá via telefòn. Si bo tin pregunta tokante bo debe di impuesto, Servisio di Kliente di Servisio di Impuesto ta keda e promé punto di kontakto via e number di telefòn 4615000 òf info.belastingdienst@gobièrnu.cw. Un gran parti di bo preguntanan, manera suministro di karchi di debedó òf seramentu di un areglo di pago simpel di te ku 5.000 florin, por ser manehá direktamente pa Servisio di Kliente. Si un empleado di kobransa ta nesesario pa por yuda bo mas aleu, e ora’ei Servisio di Kliente lo sigurá ku bo por drenta den kontakto ku e agente adekuá.