Sigarianan elektróniko ta bai bira importante e aña nan binidero.

Willemstad,– Fundashon pa Maneho di Adikshon a tene un enkuesta bou di hóben nan kaminda e meta dje enkuesta tabata pa FMA haña un mihó bista tokante uso di supstansha.

E enkuesta tabata habrí den e periodo di yüni 2023 pa sèptèmber 2023 kaminda FMA a por a risibí datos signifikante tokante uso di supstanshanan i komportashon di hóben nan den nos komunidat. For di e enkuesta, 369 hóben a partisipá kaminda e edat máksimo tabata 25 aña. E preguntanan den e enkuesta tabata relatá tokante uso i komportashon di alkohòl, sigaria elektróniko, uso di mariwana i otro droganan ilegal.

 Segun e datos di e enkuesta por nota ku sigaria elektróniko ta birando dia pa dia mas popular bou di nos hubentut ku a partisipá den e enkuesta. Un kantidat signifikante di hóben nan ku a partisipá den e enkuesta a atmití di hasi sigaria elektróniko.  Sigaria elektróniko ta asta birando mas popular ku uso di sigaria tradishonal. Mas aleu, e opservashon ta indiká ku e popularidat di sigarianan elektróniko por krea un prekupashon tokante e posibel riesgonan pa salú asosiá ku uso di sigarianan elektróniko. Di e 369 hóben nan ku a yena e enkuesta, ya kaba 7.5% a indiká ku nan tin problema ku uso di e produkto. E problemanan ta inkluí adikshon na e sigaria elektróniko òf uso demas di sigaria elektróniko.

Basá riba e datos di uso di sigaria elektróniko, e trabounan krusial ta bira pa aloká energia na traha plan nan di prevenshon pa evitá problemanan di uso di sigaria elektróniko manera sigaria elektróniko.

Relashoná ku humamentu, 33% di partisipantenan di e enkuesta a indiká ku nan ta usando mariwana pa por hèndel ku emoshon nan fuerte i/òf hèndel ku situashon nan difísil di bida. Basá for di e data aki por nota ku hóben nan mester di tin guia pa siña trata difikultatnan emoshonal i trata situashon nan difísil di bida. Mas aleu, e resultado ku 33% di 369 hóben ta usando mariwana pa trata situashon difísil den nan bida ta duna sufisiente indikashon ku sosten pa salú mental i strategianan alternativo pa hóben nan risibí yudansa emoshonal mester bira tópiko mas importante. 

.E resultado dje enkuesta ta sugerí e nesesidat di intervenshon dirigí, programanan edukashonal enfoká riba konsumo responsabel di alkohòl, strategianan spesífiko segun género pa prevenshon di uzu di alkohòl, alternativanan na mariwana pa trata desafionan emoshonal, i konsientisá hóbennan tokante e posibel riesgonan asosiá ku sigaria elektróniko.