Silvania: e diálogo konstruktivo aki ta marka komienso di un serie di konsulta entre Minister Silvania i KBS

Pietermaai– Ayera, 21 di ougùstùs 2023, a tuma lugá kontinuashon di diálogo entre Minister di Salú, Medio Ambiente i Naturalesa (GMN), Sr. Silvania i representantenan di e spesialistanan médiko ku ta traha na Curaçao Medical Center (CMC)  uni bou di e Komishon Bon Servisio (KBS). Esaki ta lokual un komunikado ofisial di e minister a señalá.

Segun e komunikado,e komishon aki, ku a risibí mandato for di spesialistanan di CMC, lo sigui dialogá ku Minister Silvania tokante diferente tema relatá na salubridat, ku énfasis riba e Landverordening Normering Topinkomens (LNT).  Durante e diálogo, ku a tuma lugá den un ambiente di kolaborashon i interkambio konstruktivo, tantu e minister komo e representantenan di KBS a kompartí vários pensamentu i a interkambiá diferente perspektiva, ku e meta pa yega huntu na solushonnan efektivo. A trata entre otro e retonan aktual relashoná ku LNT i e posibilidatnan ku tin den LNT pa solushoná esakinan. Tambe a eksplorá ideanan pa hasi uso di estímulo fiskal komo medio pa atraé i retene spesialistanan ku a gradua resientemente pa traha den CMC.

Minister Silvania a elogiá e envolvimentu aktivo i mentalidat habrí di e generashon nobo di spesialistanan médiko. ” Ta alentador pa mira ku e spesialistanan hóben ta partisipá i kontribuí na temanan esensial pa salubridat. Esaki ta e bientu fresku ku komunidat ta tin mester di dje”, Minister Silvania a enfatisá E komishon ta determiná pa yega huntu na un solushon relashoná ku LNT i tambe ta deseá pa kontribuí na e restrukturashon di kuido di salú. Ámbos parti ta enfoká riba e importansia di tin kuido di salú aksesibel pa tur hende i pa fortifiká e konfiansa i imágen di e spesialistanan médiko den komunidat.

E diálogo konstruktivo aki ta marka komienso di un serie di konsulta entre Minister Silvania i KBS. Huntu nan lo trata di yega na solushonnan duradero ku ta yuda hiba e kuido di salú na Kòrsou na un nivel mas haltu. “Laga komunidat tur disfrutá di e bientu fresku ku nos ta bendishoná kuné. Nos kurason ta bati pa Kòrsou!”

Na mart último Silvania a sinta ku e otro organisashon di spesialista

https://fb.watch/mBwXuF4LdV/?mibextid=2JQ9oc (Klik pa wak e video)