Riba e gráfiko akí por mira e entradanan di 2022 kompará ku e añanan anterior.

WILLEMSTAD – Servisio di Impuesto a sera 2022 riba 12 di yanüari último i ta raportá un ganashi di kasi 1.3 miar florin. Segun e rapòrt interno di Belastingdienst e ganashinan di impuesto total ta 1.276.400.000 florin. Esaki ta apesar ku a paga un kantidat rèkòrt di restitushon na 2022, loke ta primi riba e ganashinan fiskal.

Loke mas a kontribuí na e bon resultado di 2022 tabata ‘omzetbelasting’ (impuesto riba benta) ku 543,1 mion florin, ‘loonbelasting’ (impuesto riba salario) di 401,8 mion florin i ‘winstbelasting’ (impuesto riba ganashi) di 136,9 mion florin. Bou di e pòst ‘overige belastingen (sobrá impuesto) di 194,6 mion florin tin entre otro onroerendzaakbelasting (OZB, esta impuesto riba biennan inmóbil) di 113,1 mion florin, ‘overdrachtsbelasting’ (impuesto di transmishonnan patrimonial) di 50 mion florin i ‘motorrijtuigenbelasting’ (impuesto di vehíkulonan di motor) di 33,3 mion florin.

Silvania riba Facebook: “Minister di Finansa Javier Silvania for di dia ku ela asumí e kargo a konsentrá fuertemente riba oumentá e ‘tax compliance’ (kumplimentu fiskal). Na lugá di oumentá e tarifanan di impuesto pa generá mas ganashi, e minister a sòru pa kada bes mas pagadó di impuesto aportá na e kaha di Pais. E strategia akí a resultá asina eksitoso ku resientemente e minister a asta anunsiá redukshonnan dje tarifanan di ‘winstbelasting’, ‘loonbelasting’ i ‘inkomstenbelasting’. Den 2023 porlotantu nos lo sigui riba e mesun kaminda. Ta realisá e oumento di kumplimentu i porlotantu e ganashinan fiskal adishonal pa via dje esfuersonan konhuntu di Stichting Belastingaccountantsbureau (SBAB), Inspekshon di Impuesto i di Duana.”