Willemstad –  Resientemente, Ministerio di Tráfiko, Transporte i Planifikashon Urbano (VVRP) a organisá un simposio, ku diferente “stakeholders”den transporte públiko. Durante di e simposio, Servisio pa Tráfiko i Transporte (UOVV) a duna un presentashon di kambionan ku sifranan aktual, proyektonan nobo, i roposishon di 3 kambionan den lei i nan benifisio pa kada grupo den e sektor di transporte públiko.

VVRP a proponé pa aktualisá e leinan aktual di Ordenansa Insular pa Transporte Públiko. Pa por kana e proseso, ku e meta pa implementá e kambionan di un manera efektivo, ta importante pa involukrá tur e “stakeholders” ku ta trata ku e tema aki diariamente den nan área di trabou. Di e forma aki nan por duna sugerensia, i ta krea sosten pa e proseso di kambionan di lei.

Na final den e sekshon di “brainstorm”, tur presente por a hasi pregunta, duna komentario i sugerensia riba e proposishon di tres kambionan nobo di lei pa futuro di transporte públiko.

E 3 proposishon di kambionan ta enserá subida di edat di shòfùr di bùs, kita e máksimo kantidat di pèrmit di taksi i “toerwagens”, i komersialisá i profeshonalisá e sektor di transporte publiko pa e parti di taksi. 

Meta di e simposio tabata pa haña aporte di “stakeholders” di Transporte Publiko. Durante e simposio, tabatin partisipashon aktivo di ”stakeholders” i interkambio balioso riba e temanan.