Decaster a konfia ku informashon di ministerio di VVRP tabata verídiko, pero e lider sindikal ta lamentá ku esaki no tabata e kaso.

Willemstad,– Presidente di e sindikato ku ta bringa pa derechi di taksista i shofùrnan di bùs, Giovanni Decaster, a indiká ku e ta lamentá kon VVRP a publiká informashon robes den un komunikado di djaweps 12 di òktober.

Den un komunikado publiká riba e fecha ariba menshoná ministerio di VVRP ta kondená i akusá tres shofùr di bùs ku lo a menasá un ámtenar ku ta traha na ministerio di VVRP. E komunikado a asta bai asina leu ku indikando ku “Gobièrnu no ta tolerá esaki. E ámtenar a hasi denunsia na Polis pa e aktonan aki. VVRP ta indiká ku na momentu ku por konstatá ta ken ta e personanan ku a hasi nan mes kulpabel na e aktonan aki, lo bai na skòrs e personanan ei, i/òf kita nan pèrmit. Di e forma aki, e personanan aki lo no por sigui laborá den sektor di transporte públiko. Lo hasi esaki den estrecho koperashon ku Polis. E komportashon aki ta unu kompletamente inakseptabel”.

Basá riba e informashon di e komunikado di VVRP presidente di STO, Giovanni Decaster, a duna su reakshon splikando ku STO no por para tras di e akshon nan di e shofùrnan aki. Demas investigashon di Decaster mesora a kambia e punto di bista di e lider sindikal. Segun Decaster su reakshon indikando ku STO no por para tras dje shofùrnan no tabata na su lugá mirando ku e komunikado di VVRP a duna informashon róbes. Ta despues ku el a tende e otro banda dje medaya, el a bin komprondé henter e suseso. Tambe Decaster a splika ku demas investigashon ta mustrando ku ningun partido no e entregá denunsia, pues e komunikado di VVRP tabata duna informashon robes riba diferente aspekto.

Segun Decaster e shofùr akusá di e menasá un ámtenar tabata konosé e ámtenar riba un nivel personal. Ta na momentu ku e shofùr konserní a  opta pa kibra ku e relashon personal, e shofùr a nota ku e ámtenar a kuminsá ku boikòt e shofùr. Segun informashon, e shofùr tabata riba lista di petishon pa bira un “vergunninghouder”. Na momentu ku a relashon personal a bin kibra, e shofùr a komprondé ku e ámtenar tabata hasi diferente kos pa no honra e petishon. Esta e ámtenar a kuminsá hunga un wega di boikòt.

Ta akinan a e shofùr a tuma kontakto ku e ámtenar kaminda e ámtenar mes a duna e shofùr pèrmit pa bai na kas dje ámtenar. Unabes na e kas, emoshon nan lo a oumentá, kaminda un pleitu a kuminsá.

Pa sorpresa di e shofùr, algun dia despues ministerio di VVRP a publiká den un komunikado ku e ámtenar konserní a entregá un denunsia, pero demas investigashon awor ta resultado ku e denunsia nunka a ser firmá. Segun informashon, tantu e ámtenar komo e shofùr a presentá na warda di polis, pero dado momentu a resultá ku e ámtenar mes a opta pa no entregá un denunsia.

Awor ku ámbos banda ta konosí e lider sindikal di STO a indiká ku e ta lamentá ku el a reakshoná solamente for di e informashon di VVRP. Segun Decaster, el a konfia den informashon di gobièrnu i den e kaso aki e gobièrnu a lag’é na kaya. Tambe Decaster a splika ku su kontaktonan no por a verifiká ta kua shofùrnan VVRP a menshoná den e komunikado, pero ta despues ku e shofùrnan mes a tuma kontakto ku Decaster, e lider sindikal por a tende e otro banda dje medaya.