Sr. Gregory Wilson di Sindikato ABVO.

Willemstad- Den oranan di ayera na UOC mester ta tin un manifestashon unda sindikatonan di Sitek i tambe ABVO mester a presentá serka e tim di maneho pa trese e prekupashon dilanti di e trahadónan.

Vigilante a kombersá ku Sr. Gregory Wilson di ABVO kende a splika e situashon ku ta pasando ya pa basta aña kaba ku e trahadónan ku ta keda intimidá òf menasa pa un persona. Sr. Wilson a splika ku den fin di siman nan mester tabata na kareda ku un situashon ku tin ta reina pa basta tempu kaba unda tin menasa i tambe ta papia di forma no aseptabel ku personal. Esei a pone ku e sindikato a tuma e fin di siman pa por a atendé e situashon aki i a tuma kontakto ku e hunta di universidat. Esakinan a konsehá pa traha un karta pa e rèktòr i tambe un kopia pa nan unda ta splika e situashon di menasa ku tin i tur e detayenan ku tin relashoná ku esaki.

Mesora a traha e karta i a mand’é pa e hunta di universidat i tambe e rèktòr unda a pidi pa nan por haña un kontesta djadumingu den oranan di mèrdia pa sa kiko lo a bai sosodé. No a risibí e kontesta di parti di nan i esei a pone ku e sindikatonan a bai na universidat i a invitá SITEK tambe pa bin huntu. A papia ku e trahadónan tantu esnan miembro di sindikato i no miembro.

Na final a pidi un oudiensia chikí ku e rèktòr pa por a puntr’é kiko lo bai pasa den e situashon ku e trahadónan a wòrdu menasa i ta sinti nan insigur. Ta un universidat ku ta un organisashon di formashon di mas haltu di bo sosiedat unda bo mester forma bo miembronan, komunidat i mester tin hende ku ta traha ku ta den un ambiente saludabel, safe i sigur. No ta asina ku e hende ta bini na e universidat i sinti ku un ora pa otro kos por pasa.

E komportashon di e persona envolví ta hopi ferfelu. E rèktòr a splika nan ku e la tuma nota di e karta i nan a prohibí e persona di subi e tereno i ta hasiendo investigashonnan pa wak kiko ta bai sosodé. E situashon aki tin ta reina pa basta aña kaba i djabièrnè último e gota a yena den e hèmber  unda polis i tambe skuchami mester a bin. E dosentenan a splika ku nan no por sigui mas den e situashon. Un dosente mester sintié trankil pa e por duna e materia na e studiantenan i e mes ta sintié insigur. E persona no ta duna lès na e universidat pero e ta manager di asuntunan di ICT i ta envolví ku hopi hende. Tin hopi studiantenan tambe ku ta tuma nota òf ta tin eksperenshanan ku e persona aki.

Ta hasiendo investigashon e dianan aki pa trese den balansa e nesesidatnan di e organisashon i e persona. Bou di personal i tambe sindikatonan ta biba e pensamentu ku den pasado hendenan a bai kas pa kosnan insignifikante i den un kaso pisa asin’aki ta spera ku e desishonnan hustu i korekto ta kai.