Warda Kosta: informashon ku Warda Kosta a suministrá Korte Penal ta indiká e sistema di radarnan Warda Kosta por ta “kita” posishon di Go Fastnan riba laman, for di riba radar.

NIEUWE HAVEN— Ku e situashon delikado na Venezuela, presensha di Warda Kosta Karibe Ulandes, na frontera di awanan venezolano ta bira un tópiko delikado. E motibu prinsipal ta akusashonnan kontinuo di narkotrafikantenan reklamando ku Warda Kosta ubika na Kòrsou, ta drenta awanan venezolano pa ehekutá aresto.

E reklamonan, no tabata bálido te na momento Korte di Hustisia na Kòrsou tambe a duda den e presensha di Warda Kosta na frontera di awanan teritorial venezolano. Algun luna pasá por ehèmpel, hues di Korte Penal den Promé Instansha, Siegfried Carmelia, a súplika Ministerio Públiko pa ordená Warda Kosta pa un klaridat. E honorabel hues den Korte Penal mester a tuma su tempu i skors tratamentu  pa tuma un desishon ku tin algun tempu ta kologando durante tratamentunan na Nieuwe Haven. Ta trata di e problemátika di GPS riba yolanan (Go Fast) riba laman ganchu na momento Warda Kosta interseptá nan. E biaha aki, korte a duda den informashon suministrá pa Warda Kosta. E datonan den e GPS di e yola, no tabata kuadra i a surgi duda den e informashon suministrá pa Warda Kosta.

Último tres luna so, tin por lo ménos 15 narkotrafikante venezolano ta akusando Warda Kosta di ta drenta nan awanan unda nan no tin outoridat pa interseptá. E akusashonnan ta andando for di Yüni 2023 pero último datonan ta lanta preguntanan si en bèrdat e akusashon di e narko-nan ta bálido. Gruponan  insistentemente a deklará riba nan duda abase di nan GPS ku ta kontradiktorio na lokual Warda Kosta a indiká. Fiskal di Ministerio Públiko den unu di e kasonan tampoko no por a duna un kontesta. E kordinatonan indiká pa Warda Kosta no por a aklará korte miéntras tin sospechoso bastante konkreto ku hasta unu di e Go Fastnan a disparsé fo’i radar, lokual ta kasi imposibel. Korte a sospecha manipulashon di data i ordená un investigashon.

E situashon ta preokupante pasobra na e momentonan aki, Servisio di Informashon Hulandes, Servisio di Informashon i Seguridat Militar MIVD i Servisio di Informashon i Seguridat General AIVD, a start konhuntamente un investigashon di e desaroyonan polítiko i militar na Venezuela. Esei ta pará den e Relato anual Públiko di ámbos servisio, ku a publiká. Atenshon spesial ta bai na e posibel efektonan ku e desaroyonan aki por tin riba Reino Hulandes, pa ta mas eksakto riba e islanan Aruba, Boneiru i Kòrsou. Den kuadro di e desaroyonan aki marina Venezolano, ku a selebrá aña pasá su di 200 aniversario, a modernisá su fleta. Ounke hopi di e renovashonnan tabata prinsipalmente kosmétiko, a ehekutá aktualisashonnan signifikante riba algun barku di patruya klase Guaiqueri, ku ta ekipá ku misilnan kontra barku nobo. Ademas Venezuela a kumpra unidatnan di superfisie nobo, manera un barku pa vigilá kosta, un barku di apoyo logístiko i boto nan di atake rápido.

Esaki ta sufisiente motibu di prekupashon pa Warda Kosta Karibe, operando for di nan base na Kòrsou. E skèn inteligente ta konkluí ku seguridat di e partinan Karibense di Reino Hulandes, ta na “kuestion” mirando e proksimidat i e menasanan potensial ku ta basá riba e instabilidat na Venezuela.

Foto Venezuela Menasa

Atenshon: prensa hulandes for di 2023 ta siguiendo e situashon di Venezuela i konsekuenshanan pa islanan ABC.