Bòrchi di STÒP tambe a wòrdu tapá.
Willemstad,– Den dianan di fiesta un siudadano ku tur dia ta usa nos kareteranan a bati alarma na Vigilante splikando tokante un situashon ku mester di atenshon agudo.
Ta trata di un krusada den e bario di Amerikanenkamp ku ta bai direkshon di Gosieweg. Debí na e gran kantidat di awaseru e krusada Generaalsweg – Kolonelsweg a haña demasiado mata. Esaki a resultá ku outomoblistanan no tin un bon bista mas den e krusada. Mas aleu, e gran kantidat di mata den e roi, pegá ku e krusada, a krese i tapa un bòrchi di Stòp kual por kousa konfushon bou di outomobilistanan.
E krusada ku a wòrdu tapá dor di matanan di roi ta un dje krusadanan prinsipal ku ta konektá Gosieweg ku e bario di Muizenberg/ Suffisant, pues ta un krusada ku tin demasiado trafikashon di outo. Segun e siudadano ku a alertá Vigilante, e ta trafiká tur dia bai trabou pasando e krusada na Amerikanenkamp i riba diferente okashon el a nota di aksidentenan riba e krusada aki. “Lastei mes tabata tin un aksidente frontal den e kaya”, e persona tabata splika Vigilante. Tabata tin un vehíkulo ku tabata sali Amerikanenkamp pa bai Gosieweg, e otro vehíkulo ke a drenta Amerikanenkamp. Segun e siudadano, debí na e palunan ku ta saliendo for di man, niun di dos outomobilista no a wak otro i asina a surgi un aksidente. Tambe e siudadano a splika ku e situashon ta masha peligroso mes.
Apesar ku durante 2022 diferente kaya a wòrdu limpiá, tòg por nota ku e limpiesa no ta sosodé riba forma kontinuo. Pa falta di limpiesa kontinuo por nota ku ya vários kaya ya a wòrdu tapá atrobe ku palunan resultando na situashon nan peligroso manera ariba menshoná.