UTRECHT—Organisashon di botikarionan KNMP a registrá skarsedat di 1514 remedi den 2022, prinsipalmente pa problemanan ku produkshon/distribushon.

Segun e asosashon di botikarionan nunka antes tabatin skarsedat di remedinan pa mas di dos siman den Hulanda. Prinsipalmente di tabletnan pa kombati defisiensia hiperaktivo. Segun KNMP por a resolve i remplasá e skarsedatnan den 75% ku remedinan ku mesun ingredient aktivo. Mas di mitar di skarsedatnan a keda resolve den 10 siman. Pero ta trata di un oumento drastiko di skarsedat di remedinan. Den 2021 tabata trata di 1007 tipo di remedi ku no tabata disponibel. Den 2019/2020 e skarsedat tabata mas grandi ku kasi 1500. Den e añanan anterior e skarsedatnan tabata menos ounke tur aña tabatin oumento. For di 1 yanuari distribudornan ta obligá pa pone un reserva ku por kubri eventual eskases pa 6 siman. Esaki ta nesesario pasobra pashentnan, botikarionan i otro dunadó di kuido tin hopi problema ku esaki diariamente. E pregunta ta si e reserva obligatorio ta solushoná e skarsedat di remedinan. Segun ekspertonan e medida no ta kita e vulnerabilidat di e sistema di remedinan. E problema ta tambe ku Hulanda ta birando mas dependiente di eksterior pa remedinan. Sin den pasado tabatin desena di fabrikantenan di remedi den Hulanda, aktualmente a sobra alrededor di 20. Niun fabrika ta produsí solamente pa e merkado hulandes. E siman aki fabrika InnoGenerics ta sera su portanan, e último fabrika di remedi den Hulanda ku tabata produsí pa merkado hulandes. E fabrika a bai bankarota resientemente. InnoGenerics tabata produsí anualmente 600 mion remedi pa merkado hulandes, inkluso remedinan kontra epilepsia, malesanan kardiovaskular, diabetis, antidepresiva, antibiotika i remedinan pa dolor. Ta trata di remedinan generiko. Ministerio di Salubridat ta bisa ku ta importante pa bini ku un maneho Oropeo pa e skarsedat di remedinan pasobra ta un problema mundial ku por solushoná solamente ku un maneho internashonal, segun un bosero.