SCHOTTEGATWEG – E investigashon ku SOAB a hasi na Servisio di Impuesto, a bira un tópiko di diskushon nashonal. Pero, e investigashon no tabata unu sin mas, sino tabatin un “skèn” pa identifiká e puntonan di atenshon i di konflikto, promé yega na e rapòrt unda minister a duna instrukshon riba su kontenido

Pa por a yega na e skèn, un evaluáshon rápido realisá pa deskribí e situashon aktual di Servisio di Impuesto (Belastingdienst), SOAB a apliká e sistema TADAT. E instrumento TADAT ta duna un evaluáshon fundamental di e prestashonnan di un Belastindienst, ku por usa pa determiná prioridatnan di reforma. Originalmente a diseñá e instrumento akí pa evaluá Servisionan di Impuesto di paisnan ku ta di un tamaño relativamente grandi. Pero asina mes e instrumento TADAT ta ofresé Belastingdienst di Kòrsou un bon kuadro di referensia kontra kua e por oponé, pasó e direkshonnan ku tin deskribí den e instrumento, teorétikamente lo mester ta evidente den kualke Servisio di Impuesto modèrno, ku ta funshoná efektivo. E meta di TADAT ta pa duna un medio standarisá pa evaluá e kondishonnan mas importante di un Belastingdienst i tambe nivel di madures den e konteksto di e kuadro di referensia di bon práktika i stándarnan internashonal. E karakterístikanan di un evaluáshon manera esaki a inkluí diferente aspekto.

Un evaluashon TADAT ta partikularmente útil pa identifiká e puntu fuerte i débil di un Servisio di Impuesto, i fasilitá un bista kompartí na tur “stakeholders” (outoridatnan nashonal, organisashonnan internashonal, paisnan donante i proveedornan di yudansa tékniko). Tambe pa determiná e agènda di reforma (metanan, prioridatnan, inisiativanan di reforma i sekuensia di implementashon), fasilitá maneho i kordinashon di yudansa eksterno pa reforma, i logra un implementashon mas rápido i efisiente. Ademas pa monitòr i evaluá e progreso di e reformanan pa medio di evaluashonnan ripití konsekutivamente. E TADAT-framework ta basá riba 9 área di resultadonan di prestashon, yamá “Performance Outcome Areas” òf POA’s.

E instrumento akí a evaluá e resultadonan optené di un Belastingdienst riba e impuestonan direkto i indirekto mas importante ku ta esensial pa entrada di gobièrnu. Asina por a forma un bista dje puntonan relativamente fuerte i débil dje Belastingdienst. Evaluashonnan TADAT ta basá riba pruebanan ku e Servisio di Impuesto mes a entregá. TADAT ta evaluá na manera ophetivo e kondishonnan mas importante di un Servisio di Impuesto i ta ofresé posibilidatnan, puntunan di atenshon i posibel reformanan pa solushoná defisensianan. TADAT no ta destiná pa evaluá òf analisá regulashon òf reglanan di impuesto spesial. Durante e “quickscan” akí no ta evaluá e prestashonnan di duana tampoko.