Fiskal di Ministerio Publiko, Guilliano Schoop a konfirmá ku e investigashonnan ta “on”.

Punda—Fiskal di Ministerio Publiko, Guilliano Schoop a konfirmá na Vigilante ku Prokurador General debidamente a duna órden pa kuminsá investigá e proseso di falsifikashon durante e trayekto di Arawak. Arawak ta e trayekto pa yega na un sosio stratégiko pa maneho di Refineria Isla.

E duda den e investigashon a lanta despues ku rapòrt di Deloitte a konfirmá ku den kaso di falsifikashonnan kometé den Giro, Ministerio Publiko a ninga di investigá 3 keho. Den e kaso di Caribbean Petroleum Refinery, e investigashonnan ta sigui. Tin hasta indikashon, ku e partidonan envolví den e falsifikashonnan no ta inkluí den e grupo ku a gana e bid. Ta trata di un persona kompletamente for di e bidding pa Refineria Isla.

Ta asina ku e kompania ku a gana e bid ta SOCAP di Raul Socorro i despues SOCAP a pasa e derechinan di e destaho pa Caribbean Petroleum Refinery. CPR den nan afan pa yega na fondo a bin haña un kompania, kual kompania ta e sospechoso mayó ku a kometé e falsifikashon. Prinsipalmente ta trata di un karta riba 22 di sèptèmber 2022, pa trata na informá RdK ku e grupo CPR tin sosionan ku kapasidat finansiero di 2.5 miar dòler estado unidense. Un hòmber Ricardo F, a firma e karta. Firma di e hòmber Ricardo F, den e proseso pa duna outorisashon riba uzonan di fondo pa Curaçao Petroleum Refinery ta bou di investigashon. Ricardo F, ta sosio senior na e kompanianan Campo Marino LLC i Bar Trading Ltd. Riba 22 di sèptèmber 2022, e la manda un karta unda e afirmá balides di e Mid Term Note komo garantisá den uzo di fondonan pa Curaçao Petroleum Refinery.. Investigashonnan forensiko a bin determiná iregularidat den e karta. Segun e karta, Campo Marino i Bar Trading ta sosio ku CPR. I for di CPR a bin komprondé ku na Kòrsou tin problema pa verifiká uzo di nan Mid Term Note di 2.5 miar dòler estado unidense. Ricardo F, den e karta dirigí na RdK ta bisa di ta akshonista mayoritario den e kompanianan Bar Trading i Campo Marino ta konfirmá e sosten finansiero pa uzo di fondonan bou di e kondishonnan den e Karta di Intenshon manda pa Herbert Mensche. Ta trata di un karta di intenshon traha riba 13 di sèptèmber 2022.

Segun Ricardo F, nan ta uza Campo Marino establesé na Estádos Unídos komo Equity Partner den e proyekto di Isla pa CPR por gana i mantené e destaho. Mas aleu e ta splika RdK ku asina firma e Heads of Agreement i kontraktnan di hür, nan ta pone disponibel tur e fondonan nesesario mediante na bankonan establesé na Estádos Unídos. Ta trata di e.o., CITI Bank, JP Morgan of Bank of America. E fondonan lo ta disponibel pa finansiá e nesesidat di kapital sirkulante pa CPR. Finalmente Ricardo F, ta menshoná ku tin diferente manera kon Kòrsou por verifiká balides di nan konfirmashon riba e MTN. Swift (ku despues a resultá di tabata falsifiká), verifikashon di kumplimentu, plataformanan manera Bloomberg, Lexis Nexis, Euroclear.

A bin resulta ku e informashon suministrá pa Ricardo F, no tabata verídiko. Chèns ta grandi ku Ricardo F, por keda katalogá komo unu di e sospechosonan prinsipal den e investigashon.