Parlamentario Martina kier sa kuantu por konta riba entrada, gastunan i invershonnan di Damen.

Willemstad,– Parlamentario Steven Martina ta bisa ku e sektor di drechamentu di barku ta unu importante pa Kòrsou i tin mas ku 40 aña ta laborá. Parlamentario Martina ta splika ku DOK a enkontrá hopi krísis, pero a pasa dor di nan i a sigui ópera.

Resientemente tabatin Covid i tambe e embargo riba e barkunan ku ta bini for di Venezuela a hasi daño ekonómiko na e kompania.

Martina ta bisa di ta kontentu di a tuma nota i danki na minister ku a firma pa haña e 20 mion dòler pa un fondo di desaroyo ekonómiko i ku a ser kanalisá via CDM Holding.

Awor ku e sènnan a ser despachá, Martina kier sa kon ta bayendo ku e “business case” ku ta kurason di e plan di reskate i kon ta sigui padilanti.

Parlamentario Martina kier sa kuantu por konta riba entrada, gastunan i invershonnan di e kompania. Martina tambe ta puntra kiko ta e espektativanan ku Damen ta mira pa Kòrsou den futuro, nan lo por funshoná kompetishon i sigui pa hopi aña?. E ta puntra kiko ta e espektativanan ku Kòrsou por verwacht pues di e kompania aki.