Steven Martina a indiká ku ta basta tempu kaba e maneho pa hende grandi ta eksistí pero ta falta di ehekushon ta pone ku no a yega na resultado deseá.

Willemstad, — Steven Martina a indiká den reunion di komishon sentral den parlamento ku e análisis amplio pa maneho den kuido ta eksistí kaba, pero e pregunta ta kiko e minister konserní ta hasi ku esaki.

Parlamentario Steven Martina di frakshon MAN ta splika ku na aña 2019 diferente stakeholder den sektor di kuido a traha konhunto pa asina bin ku un maneho preparatorio pa grandinan. Pa motibu di Covid e proseso den kual mester a introdusí e maneho a bin ta stòp segun Steven Martina ta splika. Steven Martina a indiká ku diferente organisashon den kuido a partisipá pa asina bini ku un maneho akapará pa nos grandinan. Segun Steven Martina e lei tei i e análisis tei pa asina ehekutá e maneho pa grandinan, pero kiko ta bai hasi ku e informashon ku e stakeholders a produsí.

Segun Martina, e lei tei, e análisis tei pero loke falta ta e plan di pólisa, un komishon i tambe ehekushon di rekomendashonnan ku a trese dilanti. Loke Steven Martina ke sa awor for di e minister konserní ta: unda e maneho di grandinan ta i tambe lokual a traha riba dje ku a entrega na minister. Tambe Steven Martina ta puntra ku si Raad van Ouderenbeleid a haña kontesta riba e karta ku a manda pa minister Larmonie-Cecilia di SOAW pa loke ta trata maneho pa grandinan.

Steven Martina a menshoná ku ròl di parlamento ta hasi pregunta i kuestioná minister tokante e maneho ku a keda entregá for di aña 2019, kual ta un resultado di un análisis amplio ku stakeholders den sektor di kuido a hasi. Parlamentario Steven Martina a duna di konosé ku den un reunion preparatorio di komishon sentral den parlamento a hasi diferente pregunta entre otro: kon ta pará ku e maneho pa grandinan, kiko konkreto ta bai hasi ku e maneho pa grandinan, kuantu sèn ta bai aloká pa maneho pa grandinan, i kiko por ferwagt di maneho pa grandinan ku ta bai wòrdu realisá konkretamente den 2024.

Parlamentario Steven Martina a menshoná ku lo re-enforsá e preguntanan ku a hasi aki den parlamento i tambe lo referí na trabounan i rapòrtnan ku ta eksistí kaba. Parlamentario Steven Martina a bisa tambe ku a keda indiká, ku ministerio SOAW, ministerio GMN, i SVB mester traha huntu, i debí na nan idealnan polítiko no ta traha huntu. Steven Martina ta spera ku e ministerionan aki lo duna mas importansia na e rekomendashonnan ku a kedá hasí pa asina ehekutá e maneho pa hende grandi.

Steven Martina ta spera ku nos grandinan por sinti e importansia i e resultadonan ku a kedá tratá den parlamento pa loke ta trata kuido di nos grandinan.