WILLEMSTAD – Minister di Salubridat, Bienestar i Deporte di Hulanda Ernst Kuipers a rekordá Tweede Kamer tokante su desishon pa ofresé bakuna kontra COVID-19 na fin dje aña akí. El a tuma e desishon basá riba konseho di ‘Gezondheidsraad’ di 28 di yüni último. E Minister hulandes a disidí ku lo start dia 2 di òktober den henter Reino.

Ta ofresé un bakuna kontra COVID-19 na e gruponan siguiente: personanan di 60 aña bai ariba; adultonan (18 te 59 aña) ku ta risibí un invitashon anual pa bakuná kontra grip; adultonan i mucha den gruponan di riesgo médiko altu (por ehèmpel, personanan ku tin un defekto serio den nan sistema di defensa); esnan na estado; trahadónan den sektor di kuido médiko. Personanan ku no ta pertenesé na e gruponan spesífiko akí, pero ku pa ehèmpel, basá riba desishon di nan dòkter òf pa motibu di un miembro di nan famia vulnerabel, tambe por ta konsiderá pa bakuná.

Segun Kuipers, e meta di e ronda di bakuna akí ta pa protegé e personanan ku tin e riesgo mas altu di sufri un infekshon serio di COVID-19, ku ta resultá den hospitalisashon i morto debí na e viro. “Manera a tuma lugá den e rondanan di bakuna anterior kontra COVID-19, mi a pidi RIVM pa funshoná komo e entidat ku ta dirigí e preparashon dje ronda, establesé e kuadronna nasional pa e implementashon i desaroyá guianan pa e diferente partidonan ku ta embolbí den e implementashon. Ademas, mi a pidi GGD GHOR Nederland pa den koordinashon ku RIVM, tuma responsabilidat pa koordinashon di e implementashon di e ronda ku e GGD-nan. Awó ku tin mas detaye disponibel tokante e plan di implementashon, mi ta informá Parlamento di e aspektonan di implementashon di e próksimo ronda, e implementashon pa kada grupo destiná i e enfoke di komunikashon.”

Uso di Bakuna XBB

E Bureau di Medisina Europeo (EMA) a duna un konseho positivo riba 30 di ougùstùs último pa e uso di bakuna adaptá ku ta protehá kontra e variante XBB.1.5-Omikron di e viro di corona. E variante akí ta komún i ta parse e otro variantenan ku ta kirkulando aktualmente hopi. Konforme ku e konseho di Gezondheidsraad, ta usa e bakunanan nobo i adaptá akí.

Lo usa e bakuna XBB pa tur grupo di edat. Den e mayoria kaso, un dósis di bakuna ta sufisiente pa ofresé protekshon adekuá. Si personanan ku ta forma parti di un di e gruponan destiná tabata infektá ku e viro di corona den e seis lunanan promé ku nan keda di bai klínika pa un bakuna, nan no tin mester di bakuná. E defensa ku nan a desaroyá durante e infekshon resiente, den prinsipio ta ofresé protekshon sufisiente. “Sinembargo, pa algun hende den e gruponan destiná no ta asina. E spesialistanan médiko por atendé e personanan akí riba e nesesidat pa bai buska un bakuna na GGD.

Stòp Bakuna BA.4/5

Usando e bakuna XBB den e próksimo ronda lo no tin mas bakunashon ku e bakuna bivalente BA.4/5 aktual. RIVM i GGD tin mester di tempu pa prepará nan rutanan di bakuna pa e ronda di òktober, ku e bakunan XBB nobo. For di 16 di sèptèmber awó lo no ta posibel bakuná ku e bakuna BA.4/5.

Durashon i kapasidat

E fecha planiá pa kuminsá ku e próksimo ronda ta 2 di òktober próksimo, dependiendo di e entrega di e bakuna XBB. “GGD ta operá ainda ku un kapasidat básiko di 10 mil bakunashon pa siman. Mi a pidi GGD pa skala nan kapasidat durante e próksimo ronda, p’asina por bakuná tur e gruponan destiná den un período di mas o menos 12 siman. E Minister a bolbe skohe pa e periodo di opservashon despues ku e persona bakuná ta 15 minüt. Esaki ta den liña ku e maneho di otro estadonan miembro di Union Europeo, konsehonan internashonal di e organisashon mundial di salubridat (WHO), e Strategic Advisory Group of Experts on Immunization (SAGE), EMA, i informashon dje bakunanan di corona mes.”

Finalmente Kuipers a mustra riba e importansia di bakunashon: “Aktualmente nos ta den un fase diferente ku e añanan anterior i e viro di corona na e momentu aki ta endémiko. Esaki no ta kita ku nos mester keda alèrta i hasi tur kos ku ta posibel pa minimalisá ku e ta bolbe lanta kabes i tambe minimalisá e daño na salú ku ta kana man den man ku e viro. Bakunashon ta hunga un ròl importante den esaki.”