Willemstad – Ministerio di Salubridat, Medio Ambiente i Naturalesa ta informá tokante e konsekuensianan serio di dumpmentu ilegal di shushi. E komportashon iresponsabel aki no ta solamente pone na peliger salubridat públiko, pero ta menasá tambe nos bunita rekursonan natural. Ministerio ta yama komunidat pa kolaborá pa nos tur huntu logra un futuro sostenibel, kaminda nos ta traha e transishon pa un ekonomía sirkular i partisipá den kampañanan di konsientisashon.

Durante e último lunanan, dumpmentu ilegal i kimamentu di shushi na Amerikaweg a alkansá un nivel preokupante. E kantidat di huma ku ta keda produsí ta perhudiká kalidat di aire i por kousa problemanan serio di salú, spesialmente na gruponan vulnerabel manera muchanan, personanan mayor i personanan ku problema di respirashon. Ademas, nos balioso ekosistema natural ta keda afektá, ku konsekuensianan negativo pa biodiversidat i kalidat di tera i awa.

Ministerio di Salú, Medio Ambiente i Naturalesa ta enfatisá e importansia di esfuersonan konhunto pa kombatí e problema aki. Komunidat mester ta konsiente di nan responsabilidat pa protehá i konservá nos medio ambiente pa futuro generashonnan.

Un paso krítiko den e direkshon aki ta e transishon pa un ekonomía sirkular ku Ministerio di Salubridat, Medio Ambiente i Naturalesa ta desaroyando. Esaki ta nifiká ku nos tin ku hasi esfuerso pa redusí kantidat di sushi, re-usá materialnan i stimulá proseso di produkshon duradero.

Además di e transishon pa un ekonomía sirkular, Ministerio ta bai lansa kampañanan di konsientisashon ku ta informá e komunidat tokante e konsekuensianan dañino di dumpmentu ilegal i kimamentu di shushi. E projekto di konsientisashon lo enfatisá komportashon responsabel pa nos medio ambiente, manera redukshon di uso di plèstik i dumpmentu korekto di shushi.

Ministerio di Salubridat, Medio Ambiente i Naturalesa ta yama tur hende, negoshinan i organisashonnan sosial pa traha huntu pa un ambiente limpi, salú i sostenibel. Uní nos por kambia e situashon i tin un impakto positivo riba nos isla i mundu. Laga nos hasi tur nos esfuersonan pa protehá i konservá nos dushi Kòrsou pa generashon nan di futuro.

Pronto nos lo komuniká mas informashon tokante protekshon di medio ambiente, sostenibilidat i kampañanan di konsientisashon.