Banko Sentral: for di 2010 tabatin fayonan den supervishon tantu na Giro (IIG) komo na Ennia Caribe Holding (Ansary).

Skalo–  For di 2010 kosnan a kuminsá kana robes na Giro. E resultado tabata un fiansa di 170 mion florin ku Kòrsou mester a hasi serka Hulanda pa finansiá e debakel na Giro.

E grupo di invershonista merikano yamá lIG a bira e akshonista mayoritario di Girobank, ku 58,1% dje akshonnan. Pais Kòrsou i Fondo di Penshon General di Kòrsou (APC) a keda ku un parti minoritario di 41,9% (respektivamente 39,8% i 2,1%). CBCS a pidi IIG diferente dokumentu i tambe un splikashon tokante nan motivashonnan pa komo institushon di invershon bira akshonista di un banko. “IIG a menshoná algun benefisio pa Girobank manera fortifikashon di maneho di Girobank, ekspanshon di produkto di Girobank ku “Trade finance” i akseso na merkado Latinoamérika.” CBCS a pone diferente kondishon, inkluyendo garantianan ku lIG mester a duna. IIG a kumpli ku nan i dia 21 di aprel 2010, CBCS por eskrito a aseptá lIG komo un dje akshonistanan di Girobank.

Pero en realidat, IIG tabata un farse. Fo’i dje akuerdonan relashoná ku e transakshon di akshonnan presentá na CBCS na novèmber 2010, ta resultá ku TotalBank a bende tur su akshonnan den Girobank ku e CEO di Girobank Eric Garcia promé. Garcia na su turno a bende e akshonnan di Girobank algun luna despues ku lIG. E preis di benta den tur dos akuerdo tabata 80 mion dòler. TotalBank a entregá e akshonnan dirèkt na IIG despues, pasó Garcia a transferí e derecho di entrega dje akshonan na lIG. “E departamentu di Supervishon di CBCS a konkluí ku no ta muchu kla dikon e CEO di Girobank tabata metí den benta dje akshonan.” Pero segun CBCS no por papia di ningun violashon, apesar dje echo ku a ehekutá e transakshon di manera diferente ku originalmente a informá CBCS, pasó CBCS a bai di akuerdo konforme e asina yamá Landsverordening toezicht bank- en kredietwezen 1994, ku ta rekerí un akuerdo solamente pa e entrega di akshonnan den un instansia di krédito, i no p’e benta dje akshonnan akí.

Meskos ku den kaso di Giro, tabata mesun Banko Sentral ku despues di 2010 tabata aprobá tur desishonnan regardando Ennia Caribe Holding. Supervishon na Banko Sentral, a permiti Ennia Caribe Holding pa pone tur nan webunan den un makutu di Hushang Ansary, mediante e kompania Stewart & Stevenson. I via di e kompania aki a bin saka dividendo den forma di sakeo for di e bolsa di penshun na Ennia.