WILLEMSTAD – Despues di a studia den su seno e plannan ku gobièrnu a presentá resientemente den un dokumento ku e ophetivo pa modernisá e lei antikuá di transporte di persona bon, e asosiashon di taksista TSA (Thirty Steps Association) por bai di akuerdo ku e proposishonnan ku tin riba mesa. Presidente Hubert Hart di TSA i su kolega taksista Harold ‘Joy’ Rosinda ta mira bentaha grandi pa taksista den e plannan aki.

Kontrali na hopi deklarashonnan otro, hasta di hende ku no ta ni kore taksi, e dos boseronan di TSA aki ta komprendé e pensamentu di gobièrnu tras di e idea. Nan ta aploudí ku gobièrnu ke modernisá e lei ku ya no ta kuadra mas i ku ta data di e tempunan ayá. Ademas, turismo a krese i ta mustra tendensia di sigui krese, pero e kantidat di pèrmit di taksi a keda limitá na un máksimo di 200; esaki nan a determiná asina for di 1992 i esei ta konta te dia djawe. Ampliashon di e merkado ta bira kada dia mas urgente. Den práktika por mira kaba ku diariamente tin un enorme skarsedat di taksi disponibel pa respondé na e demanda kresiente. Esaki ta kousa ku e klientenan, den mayoria kaso turista, tin di warda muchu largu pa nan haña un taksi pa transportá nan.

Sigui despues di 65 aña

Un bentaha grandi ta ku, ora e lei nobo drenta na vigor segun e plannan aktual, e shofùrnan di taksi no tin nodi stòp di kore ora nan yega edat di 65 aña, loke ta e kaso si bou di e lei ku ta na vigor te awor aki. Hubert Hart: “Awor aki ta asina ku ora ami hasi 65, mi pèrmit ta kaduká i mi no ta outorisá pa kore taksi mas. Di un dia pa otro mi no pore kore mas. Mi mes ke disidí ki ora mi ta stòp di hasi mi trabou. Segun e plan di gobièrnu kada shofùr di taksi ku tin su pèrmit ta bira un empresa, sea NV òf BV. Esei ta nifiká ku ora e hasi 65 aña, e empresa ta sigui drei anto e shofùr por sigui hasi su trabou tanten ku su reibeweis ta válido. Ku otro palabra, e lei ku tin na kaminda ta brinda un oportunidat grandioso”.

Hart ta kontinuá: “Unabes ku lanta su empresa, esei por apliká tambe pa mas plachi di number pa kore taksi, tur esei bou di bandera di e negoshi. E ora ei si esei ta rekerí pa e presentá, huntu ku su aplikashon pa mas plachi, un plan di negoshi, esta un ‘business plan’. Riba tur esaki ta bini aserka ku dia e shofùr di taksi ke stòp, su negoshi tin un balor ekonómiko real riba merkado i e por bende e empresa ku esun ku ta interesá pa kumpra”.

Prepará pa ta empresario

Ta bisá ku aktualmente e shofùr di taksi ta riba su mes. Esei ta hopi relativo. Den sierto sentido en bèrdat e ta independiente, pero esei no ke men ainda ku e tin un negoshi. Gobièrnu ke pa komersialisá e sektor di taksi pa fleksibilisá i liberalisá e merkado. Loke señor Hart ku su kolega ta suprayá ta ku den e fase di transishon mester prepará e shofùrnan kon nan pa lanta i operá nan mes negoshi di taksi. E situashon aktual ta ku tur fin di aña nan ta yena e formularionan di impuesto, kada un personalmente. Ora ta trata di su propio empresa – sigur si e negoshi tin mas ku un taksi ta kore – nan mester sa for di salida kon mester atendé asuntunan di impuesto i otro obligashonnan legal.

Su kolega Joy Rosinda ta bisa ku e plannan aki ta kuadra bon den pensamentu di TSA. “Riba dje, nos a kue e plataforma inovativo ku yama 24-7 Taxi loke nèt den e periodo di Covid nan a krea i ofresé nos algun aña atras. Esaki a resultá den un oumento di kareda i mas trabou, pues tambe di mas entrada i nos por hasi uso di sistemanan moderno pa kore mas efisiente loke ta benefisiá nos klientenan tambe, hasiendo uso por ehèmpel di nan sentral ku ta disponibel tur ora di dia i ku tin kontakto kontinuo ku e taksistanan ku ta nos miembro”.