AMSTERDAM—Pa promé biaha hues a hasi doño trabou responsabel pa e konsekuensianan finansiero di corona pa un trahadó.

Esaki segun e plataforma pa maneho den kuido Zorgvisie. E enfermera di 28 aña a haña rason serka hues na Amsterdam. E sentensia a bira definitivo e siman aki. E enfermera a haña long covid despues di kontagio ku corona den un kas di kuido na Zuid-Holland. Ainda e tin kehonan médiko. Komo konsekuensia e no por traha kompleto mas i mester di yudansa den kas. Despues di 2 aña malu a korta den su entrada. E doño trabou mester kompensá su pèrdida di entrada i ekstra gastunan di malesa. Ainda korte no a determiná e suma di kompensashon pero esaki por alkansá sientos di míles di euro. E enfermera a prueba ku el a haña corona na trabou segun hues. Despues di kontakto ku un pashent kontagiá el a bai den isolashon i no a risibí ningun bishita na kas. Den e periodo ei el a mira solamente su mayornan riba distansia i tabata laga kompras keda entregá na su kas.

E trahadó no a haña aprobashon di e dokter di e instituto di kuido pa bisti un tapaboka. Otro trahadonan tampoko, pasobra tabatin tiki tapaboka i habitantenan lo a spanta. Ademas, e enfermera no por a tene e distansia sosial (1,5 meter) tur ora pasobra e tabata traha ku habitantenan ku demensia. E doño di trabou no a kumpli ku su deber di kuido, segun hues. Ku e sentensia aki mas trahadó den kuido por disidi di bai hues. Pero nan mester por demostrá ku nan a keda kontagiá na trabou. Durante e pandemia di corona personal den kuido tabata kore risiko di kontagio. Prinsipalmente den kasnan di kuido personal mester a keda traha sin protekshon. Alrededor di 1000 trahadó den kuido a pèrdè nan trabou pa motibu di long covid. Ta kalkulá ku miles di hende den Hulanda tin kehonan duradero/permanente di corona.gran mayoria no por funshoná normal mas i a keda ku kehonan di kansansio, dolor di muskulo i perdida di memoria.