Investigashonnan sientífiko ta indiká ku transporte públiko tambe ta un aspekto importante pa kombatí desempleo riba un nivel lokal i regional.

Willemstad,– Sifranan públiko dor di Ofisina Sentral di Statistik (CBS) ta indikativo ku desempleo ta bahando, pero ketubai esaki ta riba 10%. Banda di invershon nan pa krea kuponan di trabou, investigashon nan sientífiko ta splika ku konektividat pa e yega na e kuponan di trabou no mester wòrdu balotá.

E publikashon di CBS tokante e merkado labor lokal ta indiká ku aktualmente e desempleo a baha di 19.1% na 13.1%. Den e mesun publikashon e nivel alarmante di desempleo bou di hubentut di 42.2% a baha na 29.8%.

Pa kombatí desempleo gobièrnu di Kòrsou ta kanando diferente trayekto di invershon. Invershon nan den kursonan den turismo, invershon den edifisio i konstrukshon i hasi Kòrsou mas atraktivo pa kadenanan hotelero tur ta proyektonan pa trata na krea mas kupo di trabou, kaminda ta enfatisá na redusí desempleo. Apesar di plan nan riba mesa pa invertí den kupo di trabou, e konektividat pa yega na e trabou no ta risibí su atenshon meresí.

Tres diferente investigashon sientífiko a konkluí  ku un transporte públiko aksesibel ta un aspekto vital pa promové empleo. Tantu investigashon nan di Thomas Sanchez di 1998 i 1999 komo investigashon di Daniel Johnson na 2017 a konkluí e argumento ariba menshoná. E investigashon di Johnson a asta diskubrí ku e nivel di empleo ta mas haltu na momentu ku e ruta di transporte públiko ta mas kòrtiku i efisiente. Sinembargo e investigashon di Daniel Johnshon a proponé pa otro investigashon nan di desempleo, analisá e aksesibilidat di transporte públiko tambe.

Un otro investigashon a agregá tambe ku transporte públiko mester wòrdu mirá komo un oportunidat pa amplia e posibilidat di empleo. Transporte mester wòrdu mirá komo un servisio ku ta amplia e efisiensia ekonómiko kaminda ta agregá oportunidat pa personanan por traha den otro área. E investigashon aki a keda kondusí dor di Colin Gannon i Zhi Liu na 1997.

Aktualmente e kompania estatal enkargá ku transporte públiko, ABC Busbedrijf, ta tratando na oumentá kordinashon entre konvoinan di ABC i bùsnan chikí. Durante un enkuentro ku parlamentarionan na e ofisina di ABC Busbedrijf, direktor John Cijntje a splika ku aktualmente ABC Busbedrijf tin un konsepto riba mesa kaminda bùsnan chikí ta keda kore solamente na Banda Abou i ABC Bùsbedrijf ta keda move entre Barber i Otrobanda. Segun e gerensia, un konsepto nobo aki lo sòru ku konvoi lo por kore di Bandabou pa Otrobanda kada 45 minüt lugá di kada 2 ora manera e ta aktualmente.