Bùs mester benefisiá personanan ku tin un desabilidat pero tambe personanan di mas edat.

WILLEMSTAD, — Parlamentario Ramon Yung ta kompartí ku e sistema di bùs, pues bùsnan mes i parada di konvoi no ta fásilmente aksesibel pa personanan ku desabilidat. Tambe esaki ta forma un opstákulo pa personanan di edat. 

E parlamentario a splika anteriormente ku e infrastruktura di Kòrsou no ta na bentaha di personanan ku desabilidat. Yung ta menshoná ku e vehíkulonan manera por ehèmpel bùs no ta trahá pa transportá personanan ku desabilidat.  Tampoko e paradanan di bus no ta fásilmente aksesibel ya komo e bòrchi bùsnan no tin rampa kaminda un hende ku ta den ròlstul por kore ku subi esaki. Ta asina ku na paisnan ekstranhero ta inkluí personanan ku tin ròlstul den e sistema di infrastruktura.

Tin un sistema kaminda e bùs ta baha di nivel ya e persona ku ta sinta den ròlstul ta subi un brùg entre e parada di bus i e bùs pa asina esaki por drenta i sali mas fásil. Pero na Kòrsou no tin un tipo di bùs asina aki, Ramon Yung ta splika.  Ramon Yung ta menshoná ku ora bestèl bùs for di afó no mester pensa solamente riba personanan ku tin niun limitashon i mester inkluí personanan ku tin un limitashon tambe.

E bùsnan ku ta inkluí personanan ku desabilidat no ta benefisiá personanan ku un desabilidat so. E bùsnan aki no ta solamente pa hende ku desabilidat ku ta den ròlstul pero tambe pa hendenan ku ta di edat. Parlamentario Ramon Yung ta splika ku na e momentu nan aki e ‘oprit’ pa subi konvoi ta hopi haltu pa hende di edat subi. Si tin sistema di bùs ku ta baha mas abou kaminda hende grandi por subi ta algu ku lo mester traha riba dje, segun e parlamentario.