Tin kompetensia grandi entre paisnan pa lokual ta trata servisio di transporte na turista i esaki tambe mester keda optimalisá na Kòrsou. 

Willemstad, — Minister Cooper a indiká den reunion di komishon sentral na parlamento, ku tin un trènt den kual turista ta eksigí mas i mihó servisio.

Minister Cooper a indiká ku tin kompetensia grandi entre paisnan pa lokual ta trata servisio di transporte na turista. Awendia turista ke mas konfortabilidat den nan biahe, pues ta pidi hotèl den nan ticket i tambe transporte entre hotèl pa èrpòrt, segun minister ta splika. Minister a menshoná ku por ehèmpel kompanianan krusero ku bini Kòrsou, ke pa kompanianan di Kòrsou ofresé  sierto servisionan i tambe ku vehíkulonan di transporte ta tene nan mes na sierto kondishonnan.

Minister Cooper a duna ehèmpel den kual el a menshoná ku kompanianan krusero ke pa Kòrsou ofresé pre-paid tours i tin un seguro di pasahero ku ta mas karu ku leinan di Kòrsou ta eksihí aktualmente. Tambe ta eksigí ku vehíkulonan di transporte ta kumpli ku sierto kondishonnan por ehèmpel erko i orario di skema i kuantu e trep ta kosta. Minister a indiká ku ABC busbedrijf ku ta atendé ku vehíkulo di transporte grandi, so ta traha ku orario i ruta. Pa loke ta trata bùsnan mediano i chikitu esakinan no ta traha ku skema di orario fiho.

Segun minister di VVRP ta splika, e ta bisa ku ke trese kambio den servisio na turista i ku tur bus mester  tin un reglamentu di servisio kual ta pone ku transporte lo ta mas konfiabel. Minister Cooper a bisa dor ku gobièrnu ke garantisá transporte públiko den orarionan pafó di demanda, mester supsidiá esaki. Tambe minister a indiká ku e maneho nobo den transporte mester ta aksesibel, konfiabel, pagabel i e servisio mester ta optimalisá.

Minister a menshoná ku dor ku a identifiká tur e rutanan i a mehorá e konekshon Punda, Otrobanda, UoC i konekshon pa Barber, a redusí tempu di biahe di mas di 29%.  Cooper a indiká ku e vishon pa un transporte públiko optimalisá, ta ku ABC busbedrijf lo bai kore e kamindanan grandi i bus chikí lo kore den e barionan.