DEN BOSCH—Den un investigahon grandi riba un seri di atrakonan ku eksplosivo na Alemania polis a detené tres hòmber ayera mainta na Den Bosch.

E sospechosonan a keda detené durante un akshon di polis grandi relashoná ku e investigashon na 25 lokalidat den Hulanda. E investigashon ta trata mas di 10 atrako ku eksplosivo for di mart 2022 den Alemania segun Omroep Brabant. Reshèrshi di Den Bosch huntu ku polis aleman tin bista riba un banda ku ta trata den konstelashon interkambio. Den e atrakonan ku eksplosivo sospechosonan a bai ku mas ku un mion euro. Den e investigashon ta indika ku e sospechosonan ta bini di prinsipalmente Den Bosch. Polis a hasi entradanan ku 300 agente ayera mainta den regio di Den Bosch, Oss, Ankeveen, Berkel i Rodenrijs, Utrecht i Amsterdam kaminda a kontrola varios kas, lots i garashi. E tres sospechosonan di 19, 26 i 31 aña a keda detené. E sospechoso di 31 aña a keda detené riba petishon di outoridatnan aleman. A start un prosedura di ekstradishon. E sospechoso di 19 aña a keda detené pa poseshon di arma i e último sospechoso pa poseshon di eskplosivo i arma. Tur a keda enkarselá. Polis no ta eskluí mas detenshon. Den un apartamento na Den Bosch i un kampamentu di bibienda mobil na Oss a haña eksplosivonan ku ta usa pa atrako riba bankomatikonan. Pa e motibu aki a evakua tres piso di e edifisio. Servisio di desmantelashon di eksplosivo di Defensa (EOD) a desaktiva e eksplosivonan. Den un edifisio na Rosmalen tabatin 18 kilo di meth. Na Ankeveen i Amsterdam a konfiská outonan, tambe a konfiská armanan na diferente lokalidat. Tambe polis a bai ku skuter, plaka kesh i kimikalia pa produkshon di droga sintetiko. Hopi atrako ku eksplosivo na Alemania ta trabou di hulandesnan. Pa e aña aki ya outoridatnan a detené 60 hulandes pa atrakonan na Alemania, mitar ta di Utrecht. Kriminalnan ta pasa frontera pasobra bankonan a kita hopi bankomatiko na Hulanda i a tuma mas medidanan di seguridat pa evita atrako. Na Alemania ainda ta usa hopi plaka kesh i por haña hopi bankomatikonan.