Segun e akusadonan ta e víktima mester a lòs bala promé.

NIEUWE HAVEN,– Korte den Promé Instansha, ayera a trata e kaso unda e eks funshonario di polis, Niven Clemens Patrick Van Thijs nasé Kòrsou dia 16 ougùstùs 2000 a pèrdè su bida. Van Thijs a bin fayesé durante un tiroteo riba 19 di mart 2023  na Rotònde Palu Blanku.

 Kuater (4) akusado hóben, di apénas 20 i 21 aña a presentá dilanti wes pa responsabilisá nan aktonan unda Ministerio Públiko ta akusá nan di konsientemente a plania e morto di van Thijs. Ademas tur kuater ta keda akusá di tabata den poseshon di un arma di kandela. Ta trata di Giurvanni Zulia (5 yanüari 2002), Adriane Sophia (2 ougùstùs 2003), Djaver-Rion Lomp (18 òktober 2003) i Nigarryen Eduarda (30 mart 2002). Segun tratamentu di e kaso ayera, tabata riba djadumingu 19 di mart 2023 alrededor di 03.18’or di mardugá, Sentral di Polis a risibí informashon di un kaso di tiramentu ku a tuma lugá na Plasa Hariri/Rotònde Palu Blanku.

For di un investigashon preliminar a sali na kla ku despues di un diskushon entre un grupo di hóben den área di Saliña, a surgi un tiroteo. Esaki a tuma lugá  na altura di Palu Blanku despues ku tabatin un persiguishon kaminda e kuater hóbennan aki ku tabata den un outo a pèrsigui e outo di e víktima.  Segun e akusadonan a konta den korte ayera tabata e víktima Van Thijs ku a pasa bisa algu den nan direkshon den Hanchi Makaku. Nan ta konta ku na e momentu ei un persona ku tabata den outo huntu ku e víktima lo mester mustra nan un arma di kandela. Nan a sigui kore tras di e outo di e víktima pitando e lusando e víktima den señal pa e por a para pa nan papia i plakia e kos, pero esaki a sigui kore normal.

Tabata altura di e rotònde di Palu Blanku ku nan a haña un chèns pa pasa e outo di e víktima kaminda ku Eduarda ku algun den su man a duna indikashon na e víktima pa e para su out i e kuater hóbennan a bai para mas dilanti kaminda e víktima tambe a para su vehíkulo.  Lomp tabata esun ku tabata manehando e outo den kual tabatin e sospechosonan. Segun e akusado nan Eduarda tabatin un telefon den su man na momentu ku el a saka su ,man i kurpa pa duna señal pa Van Thijs para e outo, pero segun e testigu Curiel kende tabata den outo ku e víktima, esaki tabata un arma.

Ministerio Públiko a laga konfiská algun vidio riba “Hanchi Makaku” i na altura di restorant Lam Yuen den kual por mira ku di bèrdat tabatin un konflikto entre e víktima van Thijs i e akusado Lomp. Pero despues tabata na altura di Plasa Hariri esta e parti final di Nijlweg pa drenta e rotònde kaminda ku e suseso a bin tuma lugá. Segun ministerio públiko e kuarteto akusado mester a blòkia vehíkulo di e víktima, pero e akusadonan ta keda insistí ku esaki no ta kuadra ku bèrdat.