Maske ku tin hopi ningamentu pero tur kos ta mustra ku ‘Festival Un Kanto pa Kòrsou’, lo ta dediká na Remeo Heyer.

WILLEMSTAD—Dia 16 di yüni benidero, ta fecha ku lo bai tin e festival ku ta karga di nòmber “Un Kanto pa Kòrsou” i ku esaki ta bai tuma lugá den Curaçao Festival Center.

Relashoná ku esei, djabièrnè awor lo bai tin rueda di prensa kaminda ku lo bin diferente informashon dilanti. Ta asina ku Vigilante Farándula ta na altura ku e aña aki, pa promé biaha lo bai tin seis agrupashon musikal ku lo bai forma parti di e festival menshoná.

Te kaminda ku Vigilante Farándula ta informá, e seis agrupashonnan musikal ta GIO The Legends, Zudup Hopi Forsa, Classic XD, ONE FLAVAZ, Dolce Band i Excellence. Otro informashon ku Vigilante Farándula ta disponé di dje via di un fuente ta duna di konosé ku e desishon a kai pa e aña aki dediká e festival “Un Kanto pa Kòrsou”, na e legendario kantante, kompositor i areglista, kende ta Romeo Heyer.

Ta asina ku Vigilante Farándula a drenta den kontakto ku Manfred “Feko” Gomes i a bisé di e informashon risibí, pero Gomes a duna di konosé ku djabièrnè awor durante di e rueda di prensa, lo bira konosí na ken e festival lo bai keda dediká. Pues esaki ta nifiká ku Vigilante Farándula ta respetá e desishon di “Feko” Gomes, kende a skohe pa no duna ningun klase di informashon i ku ta djabièrnè awor, lo bira konosí na ken e festival “Un Kanto pa Kòrsou”, lo keda dediká.