Back to Top
Responsive image
E korant di pueblo

Un shòt di bakuna no ta duna sufisiente protekshon


May 27, 2021 • 3 minüt pa lesa

Seguridat di bakuna garantisá.

PUNDA- Data riba efektividat di e bakunanan despues di un (1) solo shòt aun no ta konkreto i ta relativamente ménos kompará ku un persona bakuná kompletamente. Pa e motibu aki ekspertonan médiko ta keda pone énfasis ku mester tuma ámbos shòt di bakuna pa protekshon máksimo.

Aktualmente miónes di persona rònt mundu a risibí un shòt di bakuna kontra Covid-19. Na Kòrsou 61% di nos poblashon riba 18 aña a risibí por lo ménos un (1) shòt di bakuna, i algu mas ku 60.000 hende ya ta kompletamente bakuná. Mundialmente epidemiologonan ta di opinion ku e porsentahe di personanan kompletamente bakuná mester ta mínimo 75%, i lokal nos meta ta 85%.

Kòrsou a outorisá suministrashon di e bakunanan di Pfizer BioNTech i Moderna, mientras Hulanda a outorisá bakunanan di Pfizer, Moderna, AstraZeneca i Johnson & Johnson.

Ainda tin persona ku ta duda pa tuma e bakuna òf ku no tin sufisiente informashon riba efektividat di e bakunanan ku ta keda suminsitrá.

Pa e motibu aki nos ta rekapitulá i suministrá informashon tokante efektividat di e dos (2) bakunanan ku Kòrsou a aprobá.

Pfizer-BioNTech
E bakuna di Pfizer tin un efektividat di 52.4% pa protehá kontra síntománan di Covid-19 serka
personanan ku a risibí e promé shòt di bakuna. E 52,4% ta inkluí e 2 simannan promé ku e bakuna su efektividat ta optimal, pues e sifra di protekshon realmente ta mas haltu. Pa esnan ku keda bakuná kompletamente e efektividat ta alrededor di 95%. Esaki segun dokumentonan di atministrashon di alimentashon i medikamentu (FDA) na Estádos Unídos.

E sifra berdadero ta entre 29.5% i 84.5%, kual ta un diferensia hopi amplio. Motibu ku no tin un sifra konkreto ta ku no tin sufisiente dato riba personanan ku a keda infektá pa Covid-19 despues di a risibí e bakuna.

Ademas e bakuna di Pfizer ta protehá mas ku 90% kontra hospitalisashon i morto.

Moderna
E bakuna di Moderna tin un efektividat alrededor di 69.5% den prevenshon di síntoma despues di e promé shòt di bakuna. Meskos ku a menshoná pa e resultado di Pfizer aki tambe e sifra konkreto ta entre 43.5% i 84.5% pa motibu ku no tin sufisiente dato riba personanan ku a keda kontagiá despues di a risibí un (1) shòt di bakuna.

Segun resultado di un ensayo ku a keda públiká pa Moderna, nan bakuna tin un efektividat di riba 90% pa prevenshon di Covid-19 ku síntoma 14 dia despues ku a keda kompletamente bakuna ku ámbos shòt.

Nifikashon di porsentahe di efektividat
E porsentahe di efektividat di e bakuna ta referí na e porshon di persona ku lo optené protekshon kompletu despues di a keda bakuná. Pues un efektividat di 80% ta nifiká ku 80% di personanan bakuná lo ta protehá i 20% no.

Pa e motibu aki ta rekomendá pa tuma ámbos shòt di bakuna. Pa esnan ku a risibí protekshon for di e promé shòt, esaki lo oumentá despues ku risibí e di dos (2). Ademas e segundo shòt ta mehorá kalidat i durabilidat di e respuesta inmunológiko ku a keda kreá.

Pa esnan ku no a kai den e grupo mayoria i risibí protekshon despues di e promé shòt, ainda tin un oportunidat pa krea esaki despues ku risibí e segundo shòt.

Statístikamente algun persona por keda sin optené protekshon kompletu kreá pa e bakuná debí ku nan sistema inmunológiko no ta reakshoná riba e bakuna mes. Pero e porsentahe aki ta sumamente abou.

Variantenan
Segun resultadonan di datos riba Covid-19 optené na Reino Uní, ku a keda públiká 23 di mei pa ministerio di Salú Publiko, e bakunanan di Pfizer i AstraZeneca ta funshoná mihó kontra variantenan ora ku ámbos shòt keda suministrá kompará ku un solo shòt. Un efektividat di 30% por wòrdu optené kontra e variante Indio despues di un (1) shòt, i entre 60 – 88% despues di ámbos shòt. Pa e variante Britániko e efektividat ta 50% despues di un (1) shòt, i 66 – 93% despues di ámbos shòt.

Resultado similar a keda publiká na Estádos Unídos kaminda e bakunanan di Pfizer i Moderna ta wòrdu usá.

Pues te ainda ámbos bakuna ku nos ta usa aki ta Kòrsou ta duna protekshon kontra e variantenan aktual di Covid-19, i por sigurá un protekshon mas haltu despues di a keda bakuná kompletu ku tur dos (2) shòt.

Login