WILLEMSTAD – Universidat di Kòrsou (UoC) mester implementá kambionan drástiko pa sigurá su sobrebibensia. E pènel ku a hasi e asina yamá “nulmeting” pa sa status dje universidat, ta enfatisá ku mester tin un ‘sentido di urgensia’ pa transformá e universidat, atraé mas studiante i atendé ku e problemanan finansiero. Balornan fundamental p’esaki ta union, transparensia, konekshon i responsabilidat.

E pènel a identifiká diferente área di preokupashon, manera e maneho institushonal kompleto, prioridat, imágen i kolaborashon. E pènel ta remarká ku tin falta di transparensia, kolaborashon entre diferente nivel dje organisashon i prioridat di aktividatnan. Ta konsiderá e ròl di lider, manera dje rector magnificus, esensial den dirigí kambio i mustra otronan riba nan komportashon robes. Tambe ta menshoná den e rapòrt di aprel último, ku UoC mester traha riba mihó relashonnan ku lidernan di komunidat, gobièrnu i prensa.

Mester mehorá e imágen di e universidat pa bringa e bahada den kantidat di studiante. Ta rekonosé diversidat, pero ta stipulá ku tin mester di mas union den maneho i ehekushon, pa por traha mas efisientemente. Apesar ku tin desafio, tin konfiansa den e potensial di UoC i embolbimentu di maestronan, otro personal i studiante. E pènel ta hasi un yamada na tantu sektor di komèrsio komo gobièrnu pa yuda e universidat realisá e kambionan nesesario.

“UoC tin un funshon esensial pa Kòrsou i region: bon enseñansa superior ta un dje faktornan mas importante pa fasilitá desaroyo sosio-ekonómiko, prosperidat, i stabilidat den un pais. Komo e úniko institushon públiko na Kòrsou, UoC ta indispensabel pa e isla.” Sinembargo, e pènel ta konstatá ku UoC ta den zona di peliger grandi, esta den un situashon masha difísil dor di problemanan di maneho, bahada di kantidat di estudiante, ku komo resultado un situashon finansiero defisiente, i un sistema di kalidat vulnerabel. Manera e Raad van Toezicht (RvT) ta pone esaki: UoC ta na su ‘point of no return’.

“E organisashon lo mester kambia nan manera di traha drástikamente pa garantisá nan sobrebibensia. E pènel ta di opinion ku no ta kompartí e urgensia akí sufisiente i no ta tur hende den e organisashon ta eksperensiá esaki. Esaki ta pa motibu ku falta ‘sense of urgency’ i tambe dor di konstatá ku un kantidat di aspekto fundamental dje organisashon no ta na òrdu, ta blòkia e mehorashonnan nesesario pa kambia e situashon.” Segun e pènel, e ‘sense of urgency’ pa kambia e universidat i asina atraé mas studiante i konfrontá e problema finansiero. mester ta prioridat di tur trahadónan.

“Términonan kla ku ta importante ta: union, transparensia, konekshon i responsabilidat. Pero e pènel ta konstatá ku na e momentu akí UoC no ta prepará pa un evaluashon di Kalidat (ITK) i ku tambe den dos te tres aña no ta posibel pa optené un evaluashon positivo di ITK for di e organisashon di akreditashon, NVAO ( Nederlands-Vlaamse Accreditatieorganisatie).” Un ITK ta un evaluashon periódiko, eksterno i independiente dje kalidat interno di maneho di un institushon. Kalidat interno ta inkluí tantu e kultura di kalidat, komo e sistema interno di maneho di kalidat di un institushon. Den e evaluashon akí, ta determiná si e sistema interno di maneho di kalidat, konhuntamente ku e kultura di kalidat, ta sigurá ku ta realisá e vishon propio di bon enseñansa.

E konklushon dje pènel ta ku e institushon mester pone prioridat na mehorashon dje organisashon riba e siguiente temanan: ‘maneho dje instituto kompleto’, ‘prioridat’, ‘imágen’ i ‘traha huntu i kolaborá’. “Solamente asina e universidat por realisá e efisensia i kapasidat (di maneho) deseá pa kuida e kalidat di enseñansa, atraé studiante i enfrentá e problemanan finansiero.”

E maneho dje instituto kompleto no ta funshoná pa diferente motibu: E interakshon entre e rector magnificus i dekanonan no ta bon, i e ròl dje rector ta esensial den esaki. Dekanonan ta pará insufisiente tras dje universidat komo un konhunto. Nan ta limitá nan mes den hopi kaso te na nan fakultat mes. No tin transparensia, no ta kumpli ku palabrashonnan, ni no ta kompartí dokumentonan. “P’esei falta e sentido di responsabilidat riba tur nivel.”

E partisipashon (di hunta di fakultatnan/dosente, hunta di personal i hunta di studiante) no ta konektá sufisiente ku e interakshon entre e institushon, fakultatnan i estudio. Esaki ta resultá den órganonan di partisipashon ku no por kumpli ku nan tarea pa sigurá e kalidat di enseñansa i maneho dje institushon. “Pa yega na mehorashon, rector magnificus mester hunga un papel dirigente i di guia. Transparensia kompleto ta un eksigensia, meskos ku komunikashon ku tur partido tokante por ehèmpel e plan di maneho determiná, resultadonan di investigashonnan i e siguimentu di esakinan. Mustra dekanonan riba nan komportashon, si nan no ta sigui e maneho determiná, tambe ta forma parti di esaki.”