WILLEMSTAD—- – Despues di un trayekto di konsulta intensivo pa yega na un solushon pa e situashon na Ennia Caribe Leven N.V. (ECL), siman pasá, gobièrnu di Kòrsou a duna di konosé ku lo bandoná e senario original di un ‘doorstart.’

Den su último komunikashon, gobièrnu di Kòrsou a ekspresá su mes na fabor di un terminashon kontrolá i den fase di e operashonnan di ECL. Den e próksimo simannan, Centrale Bank van Curaçao en Sint Maarten (CBCS) lo sigui deliberá ku e gobièrnunan di Pais Kòrsou i Pais Sint Maarten riba e senario di un terminashon kontrolá i den fase di ECL, i elaborá e plannan akí. Un terminashon kontrolá i den fase di ECL lo nifiká outomátikamente ku mester analisá kua ta e mihó manera di atendé ku e partinan di Grupo Ennia ku ta finansieramente salú, manera Ennia Caribe Schade N.V., Ennia Caribe Zorg N.V., Ennia Caribe Leven Aruba N.V. i Ennia Caribe Schade Aruba N.V. Fuera di esei, lo duna atenshon spesial na e parti di e pólisanan di ECL ku a akumulá nan balor a base di prima pagá despues ku e areglo di emergensia a drenta na vigor. E areglo di emergensia lo keda vigente durante e periodo ku ta elaborá e plan akí i CBCS lo sigui protegé interes di e kreditornan di Ennia den nan totalidat, inkluso e doñonan di pólisa.