Zaquito– – Servisio di Salú Públiko di Kòrsou (UO G&Gz ántes GGD) ta enfatisá e importansia i urgensia pa eliminá tur lugá (artefakto i tanki) kaminda sangura por pone webu aden i brui.

Nos por a nota ku temporada di awa ya a kuminsá i esaki kiermen pa e sanguranan di Dengue un oumento drástiko. Komunidat den su totalidat mester yuda evitá un eventual epidemia kousá dor di sangura. Aktualmente ya kaba algun isla den Karibe ta eksperensiando kasonan di Dengue di e tipo 2 (tin 4 tipo).

E peliger ku e sangura di Dengue (Aedes aegytpi) ta bin kuné ta ku na momento ku un sangura muhé ku ta infektá ku e viro di Dengue piká/ morde bo, e sangura ta pasa e viro over ku e tin den su kurpa pa bo. Despues di un par di dia (mas o ménos 3 dia) bo ta bira malu ku sintomanan manera doló tras di wowo, keintura, doló di kabes i wesu.  Na Kòrsou tin diferente sorto di sangura. Solamente e sangura Aedes aegytpi por infektá bo ku e viro di  Dengue, Chikungunya òf Zika. Aedes aegytpi ta un sangura ku bo ta rekonosé na su patanan pretu ku blanku. E ta hopi aktivo nèt ora solo kaba di sali i nèt promé ku solo baha. E ta pone su webunan den artefaktonan ku por wanta awa manera bleki bieu, tayer, aparatonan di kas manera was mashin, frishidèr i tambe baki di awa i renbak. No ta kustumber ku Aedes aegytpi ta pone su webunan den awa sushi manera awa di berpùt.