2023: sekretario di estado Alexandra van Huffelen. Ken tei paga e debe  èkstra di 700 mion florin pa Ennia al final.

Punda— Segun sekretario general, Relashonnan den Reino, Alexandra van Huffelen, penshonadonan di Ennia no mester prekupá ku nan kontinuashon di penshun. E daño okashoná na e bolsa di penshun, ta keda inkorporá den renegosashon di e debe. Ta trata di entre 700 mion pa 1 miar florin èkstra.

E menshon di van Huffelen, ta nifiká simplemente mas debe pa Kòrsou. Anto por lo ménos 700 mion florin èkstra riba 3.4 miar. E negoshashon di repago entre Hulanda i Kòrsou,  mester a  kuminsá na 2023.  Pero ainda e no ta riba bon pia, miéntras tampoko a akordá kuantu lo bira opsekio. Kòrsou su sostenibilidat finansiero ta dependé si Hulanda tin gratitut pa un donashon di 4 mil mion florin, òf un parti di esaki. Esaki lo bira e debe nashonal ku Kòrsou lo karga drenta 2023 i tei afektá e nivel di invershon estatal den ekonomia di Kòrsou. Saliendo for punto di bista ku van Huffelen a benta e fiasko na Ennia den debe nashonal di Kòrsou.

Gobièrnu di Kòrsou i Hulanda, ainda no tin un fin na yega riba un suma ku supuestamente mester transformá den opsekio, pa lokual ta trata e bolsa di debe. Ministernan den pasado, Gijsbertha, Martina, Rhuggenaath i awor Silvania tambe a menshoná e posibilidat pero sin detaye. Gobièrnu di Kòrsou, riba su presupuesto di likides tin un suma di 911 mion florin programá pa pagonan di fiansa durante Covid. Ta trata di e fiansanan a korto plaso di Hulanda pa yuda Kòrsou finansiá efektonan finansiero okashoná pa Covid 19. Esaki durante 2020 pa 2021. Gobièrnu hulandes a duna un “respijt” di 18 luna.

N’e momentunan aki Kòrsou debe Hulanda entre 3.4 pa 3.6 miar florin, inkluso último aprobashonnan pa fondonan di sosten di 911 mion florin mas finansiamentu pa Giro. Segun Banko Sentral durante nan último rueda di prensa, aparte di debe Hulanda Kòrsou tin debe na institutonan lokal di 600 mion florin. Ta trata un total indikativo di riba 4 miar florin. Un parti di e debe na Hulanda ta den forma di fiansa pistolero (bullet). Kòrsou mester paga solamente e kota di fiansa bek sin interes. Te ainda no por haña konfirmá kuantu e fiansanan pistolero lo bira fo’i di e total na 3.4 miar florin. Un fiansa adishonal na 700 mion florin, ta pone e debe na Hulanda surpasá 4 mira florin i kisas e debe nashonal. riba 4.5 miar florin. Ta komprendibel ku van Huffelen ta trankilisá penshonadonan na Ennia pero na mesun momento mester trankilisá e pueblo di Kòrsou tambe ku un miho splikashon i kargonan di impuesto a konsekuensha di e refinansiamentu pa Ennia.