Segun Van Huffelen ku no tin sufisiente sosten pa introdusí matrimonio di mesun sekso riba e islanan Aruba, Kòrsou i St Maarten

DEN HAAG – No tin sufisiente sosten pa introdusí matrimonio di mesun sekso riba e islanan Aruba, Kòrsou y St Maarten.

Asina sekretario di estado Hulandes Alexandra van Huffelen a kontesta miembro di Eerste Kamer Dittrich (D66)  djaluna riba su preguntanan riba e tema. Dittrich ta un di e miembronan ku públikamente ta un miembro homosexual di Eerste Kamer. Segun van Huffelen, e ta lamentá e hecho aki, esta ku ainda e islanan no ta kla pa aseptá matrimonio di mesun sekso. Pero mes momento e ta bisa ku debí na e outonomia di e islanan, su podernan ta limitá. E kombersashon tabata ku e tres minister presidèntnan di e respektivo islanan.   E la informá Eerste Kamer mesora tambe ku Korte Komun algun tèmpo atras a emití dos sentensia di hues unda ku Hof ta disidí ku Kòrsou y Aruba a violá e prohibishon di diskriminashon, manera ku e ta stipulá den konstitushon, dor di ekskluí partnernan di mesun sekso di matrimonio. 

A rekordá Tweede Kamer tambe ku tantu Kòrsou komo Aruba a opta pa bai Korte di Kasashon pa bringa e sentensia aki. “Mi ta warda e resultado di e prosedura di Hoge Raad y despues ku e sentensia ei kai, mi lo tuma nota y trese e konsekuensia dilanti despues”, e mandatario a sigui bisa den e karta.  Segun e mandatario Hulandes, e ta pensa si ku tur hende mester por kasa ku e pareha ku e ta deseá. Pero e ta rekordá tambe ku den Reino Hulandes tin 4 pais outónomo. “E outonomia ta trese obligashonnan y responsabilidat kuné. E paisnan dentro di Reino komo tal mes ta responsabel pa garantisá e realisashon di e derechonan humano y e libertatnan fundamental. No ta keda na Hulanda pa determiná con e otro tres paisnan menshoná mester implementá esaki” e mandatario a kontinuá bisando. ( noticia Cla  Aruba) .