Bahia Santa Ana– E barku krusero VASCO DA GAMA di e liña krusero Nicko Cruises di Alemania, a bishitá Kòrsou riba 23 di mart. No ta promé biaha ku e barku krusero aki ta bishitá Kòrsou, pero si bou di e nòmber aki.

E barku a ser trahá na 1993 di kual e la nabegá entre 1993 te ku 2015 bou di Holland America Line komo MS Statendam i entre 2015 pa 2019 komo Pacific Eden pa P&O Cruises i di 2019 te ku presente komo VASCO DA GAMA pa Nicko Cruises. Debí ku ta promé biaha e barku aki a bishitá Kòrsou bou di e nòmber aki, a tene un seremonia a bordo di e barku. Durante e seremonia aki Kapitan di e barku huntu ku Curaçao Ports Authority (CPA), Ofisina di Turismo (CTB), nan agente, Maduro Shipping i tambe Duana a hasi interkambio di plakat.

VASCO DA GAMA ku a mara na Matheywerf, tin un kapasidat di 1.600 pasahero krusero, pero manera e akshonista a disidí ku pa garantisá e nivel haltu di trankilidat a bordo di e barku durante su biahe, no ta aseptá mas ku 1.000 pasahero a bordo i a bishitá Kòrsou ku un kantidat total di 787 pasahero a bordo. VASCO DA GAMA su itinerario inkluyendo Kòrsou ta un biahe rònt mundu ku a kuminsá 10 di òktober último na Lisboa, Portugal a konsistí di 183 dia, 90 puerto i 5 kontinente. Nicko Cruises a parti e biahe krusero den 10 “pia” di kual Kòrsou tambe por a forma parti di e biahe rònt di mundu aki di manera ku pasaheronan Aleman ku a bini den avion di charter for di Alemania por a embarká i desembarká aki na Kòrsou den e delaster “pia”.

CPA huntu ku agente di barku, Maduro Shipping a traha huntu ku duana i imigrashon pa por a hasi esaki posibel di manera ku tur kos por a kana nèchi. Riba e mesun dia tambe a bishitá Kòrsou e barku krusero Norwegian Sky ku a mara na Mega pir Tula ku un kapasidat total di 2.480 pasahero krusero ku 2.057 pasahero abordo i tambe Marella Discovery ku a mara na Mega pir Ernest Jackie Voges ku un kapasidat máksimo di 2.47 pasahero krusero di kual a bishitá Kòrsou ku 1.856 a bordo. Si bo ke keda na altura di yegada i salida di barkunan krusero, por ‘download’ e CPA Cruise app pa mas informashon.