WILLEMSTAD——–Aqualectra den estrecho koperashon ku Ministerio di Tráfiko, Transporte i Planifikashon Urbano (VVRP) i Ministerio pa Desaroyo Ekonómiko (MEO) e aña aki atrobe ta lansa e kampaña “Kòrsou Ban Biba Fin di Aña 2023.”
E kampaña aki ta un kompetensia ku e meta pa stimulá famianan, gruponan den bario i tambe empresanan pa dòrna kas, área públiko i negoshi den fin di aña p’asina halsa e ambiente di fin di aña riba nos isla. Pa partisipá mester inskribí no mas lat ku 12 di desèmber próksimo dor di manda un e-mail ku nòmber, direkshon kaminda lo dòrna i number di telefòn na [email protected]. Un ekipo di hurado lo husga kua ta e kasnan, áreanan públiko i negoshinan ku a sobresalí entre 15 pa 29 di desèmber. Di e forma aki Ministerio di VVRP, MEO i Aqualectra, ta enkurashá un i tur pa aportá na e ambiente di fin di aña. Alabes, nan lo sòru dòrna i iluminá nos sentro di suidat.
Parti di e kompetensia ta enserá ku lo tin premio pa esnan ku partisipá. E premionan ta partí den e tres kategorianan di partisipashon na e kompetensia, kual ta kas, área públiko den bario i negoshi. Pa kategoria di kas tin tres premio. E promé premio den e kategoria aki ta Nafl. 1000, -, e di dos premio ta Nafl. 750, – i e terser premio ta Nafl 500,-. E área públiko den bario ku resultá esun mas bunita dòrná ta risibí Nafl. 2.500, – ku lo keda entregá na un organisashon karitativo di e grupo ganadó su eskoho. E empresa ku e adorno mas impaktante lo keda rekonosé públikamente komo e ganadó di e kategoria aki.
Ta bon pa indiká ku adorno i instalashon di e adorno ta pa kuenta di e persona òf grupo ku ta dòrna nan propiedat òf área públiko. Aqualectra ta perkurá pa konektá e adornonan den área públiko riba su ret di koriente.
Ban partisipá Huntu na “Kòrsou Ban Biba Fin di Aña 2023” p’asina Kòrsou bria den fin di 2023.