E Go-Fast ku dos motor ku a keda interseptá.

Nieuwe Haven,– 4 akusado a indiká den sala di korte ku personal di Warda Kosta a senk nan Go-Fast sin ningun rason. Ta trata di 4 akusado di Venezuela kende kada 1 a risibí 6 aña di kastigu.

Komo ku e hòmbernan no tabata di akuerdo ku e veredikto di korte penal, nan tur a opta pa apelá nan sentensia inkondishonal. E akusadonan Jorge Reyes Marval ( 1994 ), Carlos Asdrubal Rodriguez ( 2002 ), Wuilder Jesus Gonzalez ( 1993 ) i Jorge Marval Villarroel ( 1988 ) tur a apelá e veredikto.

Tabata dia 16 di sèptèmber 2022 alrededor di 8.22 am ku radar di Warda Kosta a detektá 2 boto den awa teritorial di Venezuela ku tabata nabegá riba un ruta ku ta konosí pa kontrabanda di droga. Mesora helikòpter di Warda Kosta a sali bai tira un bista. Banda di 10:20 am, e hèlikòpter a yega unda e “Go  Fastnan” tabata kual tabata den awanan internashonal.

Pa banda di 10:50 am tur dos FRICS’S a sali pa kuminsá ku un persekushon. Mas despues banda di 11:38 am, e 2 “Go Fast” a keda señalá pero pa 11:42 am, e 2 “Go Fastnan” a separá for di otro.

Dia di tratamentu di e kaso kual tabata dia 28 di desèmber aña pasá, fiskal a splika ku pa motibu ku no por a interseptá tur e 2 “Go fastnan”, Warda Kosta a skohe pa interseptá esun ku e hèlikòpter a mira ku tabatin mas pakete ariba. Pa 12:04 pm, e boto aki a keda interseptá i e 4 akusadonan a keda detené. Riba e boto no a bin haña niun droga pero riba e ruta ku e “Go Fast” a nabegá a bin haña 53 bala kual despues a bin resultá ku ta trata di algu mas ku 1200 kilo di kokaina.

Durante tratamentu di e kaso di apelashon e hòmbernan ta enfatisá ku nan no tabata transportá droga, pero nan tabata transportá gasolin. Segun informe, e hòmbernan lo risibí un pago di 2500 dòler kaminda e gasolin lo keda usá dor di otro piskadó ku ta bai Trinidad pa bende piská. Informashon di Warda Kosta a prueba ku e hòmbernan a keda interseptá Zuid-Ost di Boneiru, kual ta  riba un ruta konosí di smòkel droga.

E akusadonan a splika hues ta imposibel ku nan por a transportá 1200 kilo di droga. “Nos boto tabata yená ku 10 barí di gasolin i dos barí mas ku tabata duna e motornan gasolin, pues no tabata tin sufisiente área pa agregá ningun tipo di droga”, un dje akusadonan tabata splika hues. Tambe e hòmbernan a splika ku nan boto lo a senk akaso a agregá 1200 kilo di droga.

Tambe por nota ku e hòmbernan ta lamentá ku Warda Kosta a senk e boto. E akusadonan a splika hues ku si analisá e boto, por nota bèrdat ku e boto tabata muchu chikí pa karga gasolin i droga huntu. Mas aleu, e akusadonan a splika ku si a tuma tempu i investigá e boto mas profundo por a nota ku no tabata tin ningun prueba di kokaina riba e boto.

Apesar ku e akusadonan a risibí un kondena di 6 aña, prokurador general a indiká ku e tei oumentá e damanda na un kastigu di 8 aña. Tambe e PG a pidi korte pa konfirmá e veredikto di korte den promé instante komo ku ta trata di basta kilo di droga ku a keda haña den área di e hòmbernan su boto.

Abogado Tromp kende a hiba defensa pa e 4 hòmbernan a trata na trese duda ku e kantidat di droga lo no por pas den e boto. E abogado a ilustrá diferente ilustrashon pa demonstrá ku ta imposibel ku e hòmbernan por tabata tin 1200 kilo di droga i ku e 10 barínan di gasolin.

Tambe e abogado ta lamentá ku miembronan di warda kosta a senk e boto na momentu ku e boto a keda interseptá. Segun e abogado, un kantidat di 1200 kilo di kokaina riba e boto sigur lo a keda ku prueba riba e boto, pero lamentabel esaki tampoko no por keda probá mas.

E huesnan di korte di apelashon a indiká ku 14 di dezèmber nan lo duna nan veredikto den e kaso aki.