Bultonan di mariwana ku tabata drif riba laman.

Aruba, — Djabièrnè 14 di aprel den oranan di mardugá Warda Kosta den bon kolaborashon ku Kuerpo Polisial Aruba ta interseptá un boto ku a purba drenta Aruba den e parti Nort.

 Despues di un persekushon kaminda mester a los tiru di atvertensia y tiru dirigí riba e motornan di e boto pa Warda Kosta por a logra para e boto. Durante e persekushon e personanan abordo di e boto sospechoso a tira paketenan den laman. Warda Kosta a logra detené 9 persona abordo di e boto sospechoso ku tabatin intenshon di drenta Aruba. Despues di un búskeda riba lama ku e avion Dash, e helikòpter y un Metal Shark di Warda Kosta a bin encontra un kantidat supstansial di paketenan konteniendo mariwana. Djabièrnè 21 di aprel un biaha mas, pa nort di Aruba, Warda Kosta un biaha mas den bon kolaborashon ku Kuerpo Polisial Aruba ta interseptá un otro boto ku 9 persona abordo ku a intentá di drenta Aruba na un manera klandestino. Den tur dos e kasonan e personanan ta prosedente di Venezuela. E dos kasonan a ser hasi den bon koperashon ku Kuerpo Polisial Aruba. E personanan y e droga a ser entrega na KPA.