Back to Top
Responsive image
E korant di pueblo

Wardakosta di Aruba ta detektá boto ku kurpa sin bida


May 18, 2021 • 1 minüt pa lesa

Aruba— Durante di un patruya di e avion Dash di Wardakosta e tripulashon a detektá un boto ta drif riba laman, na momento ku a bai investigá e boto aki a lanta sospecho ku tin un persona sin bida den e boto ku tabata drif.

Abase di e informashon ku e tripulashon di e avion Dash a manda pa e Sentro di Reskate i Kordinashon di Wardakosta a dirigí e cutter Panter di e punto di sosten na Aruba pa bai na e lokalidat di e boto. Lokual a hasi e búskeda di e boto un reto ta e hecho ku e kondishon di laman i tempu tabata basta malu, e laman tabata brutu ku hopi bientu y olanan haltu.

E Sentro di Reskate i Kordinashon a bolbe dirigí e avion di patruya pa asistí e cutter Panter den e búskeda di e boto. Na yegada na e boto e tripulashon di Panter no a logra subi riba e boto pa motibu ku tempu tabata hopi malu. Tambe e tripulashon a detektá diferente kurpa sin bida kual nan tabata den estado avansá di deskomposishon.

E cutter Panter a hasi diferente intento pa por logra tou e boto, pero esaki no a logra debí ku e kabuya tabata kibra kadabes na kaminda. E laman brutu i e tempu malu a pone ku un dado momento e kabuya di tou a bolbe kibra i Panter a pèrdè e boto den e skur di anochi, despues di esaki no a logra detektá e boto mas.

Wardakosta a saka un notifikashon mesora pa barkunan riba laman tambe tin un ‘sharp lookout’ pa e boto kual ta drif riba laman. Wardakosta konhunto ku outoridatnan di Aruba i partnernan internashonal a kuminsá un investigashon den e kaso aki.

Login